Taremi i Interit mbetet i bllokuar në Teheran, si pasojë e situatës së fundit mes Iranit dhe Izraelit

Sport

Gazeta Express

14/06/2025 11:12

Sulmuesi i Interit, Mehdi Taremi, ndodhet aktualisht i bllokuar në Teheran ndërkohë që shokët e tij të skuadrës po përgatiten për Kupën e Botës për Klube të FIFA-s, e cila nis të shtunën në mbrëmje, pas një nate të tensionuar konfliktuale mes Iranit dhe Izraelit.

Sipas raporteve nga Sky Sport Italia, Taremi është aktualisht i ngujuar në Teheran pasi të gjitha fluturimet nga aeroportet iraniane janë pezulluar për shkak të shkëmbimeve të sulmeve ajrore midis Iranit dhe Izraelit gjatë dy ditëve të fundit.

Si pasojë, Taremi nuk ka mundur t’i bashkohet skuadrës së Interit, e cila tashmë ka mbërritur në Los Anxhelos për të nisur aventurën në Kupën e Botës për Klube. Sulmuesi i kombëtares iraniane nuk do të jetë në gjendje të largohet nga vendi derisa të hiqet ndalimi i fluturimeve.

Turneu nis me përballjen mes Lionel Messit dhe ekipit të tij Inter Miami kundër Al-Ahly të Egjiptit, në stadiumin “Hard Rock” në Florida, me fillim në ora 01:00 sipas orës britanike (20:00 me orën lokale).

Inter do të zbresë për herë të parë në fushë nën drejtimin e trajnerit të ri Cristian Chivu kundër Monterrey, në ora 02:00 BST të mërkurën, më 18 qershor (18:00 me kohën lokale, më 17 qershor).