Në ditën kur presidenti serb Aleksandër Vuçiq foli për vrasje në Veri, presidentja e Republikës së Kosovës, Vjosa Osmani, ka pritur në takim të rregullt ambasadorin e SHBA-ve, Jeffrey Hovenier.
Sipas komunikatës së Presidencës, në këtë takim u diskutua për situatën e sigurisë në vend, si dhe në fushën e politikës së jashtme dhe të mbrojtjes.
“Po ashtu, gjatë takimit u diskutua për vazhdimin e koordinimit mes institucioneve të Kosovës dhe Shteteve të Bashkuara të Amerikës në adresimin e çështjeve prioritare”, thuhet në komunikatë.
Ndryshe, Vuçiq ka vazhduar sot me propagandë që Kosova kinse “është duke përgatitur për sulm në Veri për vrasjen e serbëve
“I paralajmëroj të mos e bëjnë këtë”, ka thënë Vuçiq, duke mos ofruar as një fakt.
Deklaratat e Vuçiqit vijnë një javë para takimit në Bruksel që do ta ketë me kryeministrin e Kosovës, Albin Kurtin. /Express.