Superylli i Realit, Jude Bellingham e zbulon një pendesë të karrierës së tij

Futboll

Gazeta Express

28/03/2026 23:20

Jude Bellinghami ka kaluar disa probleme me dëmtimet që nga transferimi te Real Madridi, me më të fundit që përfundoi së fundmi.

Paraqitja e tij në derbin e Madridit fundjavën e kaluar i dha fund një mungese prej shtatë javësh për shkak të një dëmtimi në kofshë, dhe edhe pse ai pranoi se ishte një periudhë e vështirë mendërisht, nuk ishte më e rënda gjatë kohës së tij në “Bernabéu”.

Në nëntor, vetëm pak muaj pasi iu bashkua Real Madridit, ai pësoi një dislokim të shpatullës në një ndeshje kundër Rayo Vallecanos.

Edhe pse atëherë mungoi vetëm për pak javë, ky dëmtim çoi më vonë në nevojën për ndërhyrje kirurgjikale.

Duke folur në aplikacionin e tij “JB5” (sipas “Cadena SER”), Bellingham e përshkroi atë moment si dhimbjen më të madhe që ka përjetuar ndonjëherë.

“Ishte ndjesia më e dhimbshme që kam përjetuar. M’u duk sikur zgjati një përjetësi derisa ma vendosën shpatullën në vend… edhe pse ishin vetëm 90 sekonda”, tha ai.

Ai tregoi se kishte pasur probleme me shpatullën edhe më parë, gjatë kohës te Borussia Dortmundi, ku mjekët i kishin rekomanduar operacion që në fillim të sezonit, por ai vendosi ta shtyjë për shkak të Kupës së Botës 2022.

Kur u transferua te Real Madridi, ai nuk ndjente shumë dhimbje, por vendosi sërish të mos operohej për të mos munguar disa muaj në sezonin e tij të parë me klubin.

“Luaja duke e ditur se nëse bie, mund të dalë sërish. Kjo më pengonte të isha në nivelin tim më të mirë,” pranoi ai.

Bellinghami zbuloi gjithashtu se mund të ishte operuar në verën e vitit 2024, por pas humbjes së finales së EURO 2024 ndaj Spanjës, nuk donte që ajo të ishte kujtimi i fundit për disa muaj.

“Tani jam më mirë fizikisht dhe mund të rikthehem në nivelin tim,” përfundoi ai./GazetaExpress/