Superkupa e hendbollit, më 16 shkurt

Sporte tjera

Gazeta Express

02/02/2023 14:57

Superkupa e Kosovës “Pavarësia 2023”, do të organizohet më 16 shkurt në Palestrën e Qytetit në Istog.

Këtë e ka bërë të ditur sot Federata e Hendbollit të Kosovës përmes uebfaqes së vetë zyrtare, përcjell “Gazeta Express”.

Komisari i Garave, Isak Osmani, duke u mbështetur në planprogramin e Ministrisë së Kulturës, Rinisë dhe Sportit, si dhe kalendarin e aktiviteteve për festën e Pavarësisë së Kosovës, ka vendosur që të organizojë këtë aktivitet.

Po ashtu është vendosur që prej këtij viti, ndeshjet për Superkupë të jenë pjesë e kalendarit të FHK-së.

Në konkurrencën e hendbollistëve takohen Besa Famgas e Kastrioti. Besa ka fituar titullin e kampionit dhe Kupën e Kosovës, ndërsa Kastrioti ishte në finale të Kupës.

Kjo ndeshje luhet prej orës 15:30.

Ndërsa te hendbollistet prej orës 18:00 takohen Istogu e Ferizaj. Istogu ka fituar dy trofetë kurse Ferizaj ishte në të dy finalet e edicionit të kaluar. /Gazeta Express/