Studimi i ri mbi agjërimin intermitent zbulon pse nuk funksionon për të gjithë

Ushqimi/Dieta

Gazeta Express

06/01/2026 19:44

Kufizimi i orarit ditor të ushqimit duket si një mënyrë e sigurt për të humbur peshë, por ekspertët paralajmërojnë se agjërimi intermitent (AI) funksionon vetëm nëse shoqërohet me deficit kalorik.

Ekzistojnë disa forma të agjërimit intermitent. Më e njohura është dieta 16:8, ku agjërohet për 16 orë dhe ushqimi konsumohet brenda tetë orëve të mbetura të ditës. Një tjetër është dieta 5:2, e cila parashikon pesë ditë me konsum të reduktuar kalorik dhe dy ditë ushqim normal.

Një variant i AI është edhe ushqyerja me kohë të kufizuar (Time-Restricted Eating – TRE), ku marrja e ushqimit përqendrohet në një dritare jo më të gjatë se 10 orë në ditë, e ndjekur nga një agjërim 14-orësh.

Megjithatë, një studim i ri nga Instituti Gjerman i Ushqyerjes Njerëzore Potsdam-Rehbrücke dhe Charité ka zbuluar se ushqyerja me kohë të kufizuar nuk çon automatikisht në përmirësim të shëndetit metabolik apo kardiovaskular. Sipas studiuesve, edhe në këtë rast, numërimi i kalorive mbetet vendimtar – ashtu si në çdo plan tradicional për humbje peshe.

Studimi, i quajtur ChronoFast, përfshiu 31 gra mbipeshë ose obeze. Çdo pjesëmarrëse ndoqi dy skema të ndryshme TRE për nga dy javë secila: njëra ishte ushqyerja e hershme (nga ora 08:00 deri në 16:00), ndërsa tjetra ushqyerja e vonshme (nga ora 13:00 deri në 21:00).

Vaktet që u ofruan pjesëmarrëseve ishin pothuajse identike dhe kishin të njëjtën përmbajtje kalorike dhe ushqyese. Gjatë katër vizitave klinike, studiuesit morën mostra gjaku dhe analizuan ndryshimet në “orën e brendshme” të trupit përmes qelizave të izoluara.

Në përfundim të studimit, i publikuar në revistën shkencore Science Translational Medicine, u arrit në përfundimin se oraret e ushqimit mund të zhvendosin ritmin cirkadian (orën biologjike të trupit), por kanë shumë pak ndikim real në funksionimin fiziologjik.

Studiuesit theksuan se nuk u vunë re “ndryshime klinikisht domethënëse në ndjeshmërinë ndaj insulinës, nivelin e sheqerit në gjak, yndyrnat në gjak apo markerët inflamatorë”.

Ritmi cirkadian nuk përcakton vetëm oraret e gjumit dhe zgjimit, por rregullon edhe procese jetësore si metabolizmi. Për këtë arsye, Prof. Olga Ramich, drejtuesja e studimit, argumenton se humbja e peshës, në thelb, varet nga bilanci kalorik.

Ajo u shpreh:

“Të gjithë ata që duan të humbin peshë ose të përmirësojnë metabolizmin duhet t’i kushtojnë vëmendje jo vetëm orës, por edhe bilancit të energjisë.

Pavarësisht pritshmërive të krijuara nga studime të mëparshme, ChronoFast nuk gjeti ndryshime klinikisht të rëndësishme në ndjeshmërinë ndaj insulinës, sheqerin në gjak, yndyrnat në gjak apo markerët inflamatorë.

Rezultatet tona sugjerojnë se përfitimet shëndetësore të vërejtura më herët ka të ngjarë të kenë ardhur nga ulja e pavullnetshme e kalorive, dhe jo nga shkurtimi i kohës së ushqimit në vetvete.”

Ekipi i Prof. Ramich kërkoi gjithashtu më shumë studime për të kuptuar se si faktorë individualë, si kronotipi (prirja natyrore e trupit për të qenë më aktiv ose më i lodhur në orë të caktuara) dhe gjenetika, ndikojnë në reagimin e individëve ndaj orareve të ndryshme të ushqimit.

Agjërimi intermitent është bërë shumë popullor edhe falë figurave publike si Jennifer Aniston, Halle Berry dhe Kourtney Kardashian. Ndjekësit e këtij regjimi – të cilët kufizojnë ndjeshëm kaloritë një ose dy ditë në javë, ose hanë të gjithë ushqimin brenda një intervali të shkurtër ditor – pretendojnë se ai ndihmon në humbjen e peshës, ul rrezikun e diabetit të tipit 2 dhe përmirëson shëndetin e zorrëve.

Megjithatë, pavarësisht numrit të madh të studimeve që sugjerojnë përfitime, ekspertët mbeten të ndarë mbi efektivitetin real dhe pasojat afatgjata shëndetësore.

Disa paralajmërojnë se personat që agjërojnë shpesh përfundojnë duke konsumuar sasi të mëdha ushqimi në një vakt të vetëm, çka bën që kaloritë totale të mos ulen – një element kyç për humbjen e peshës. Madje, disa studime sugjerojnë se kjo praktikë mund të rrisë rrezikun e goditjeve në tru, infarkteve apo edhe vdekjes së parakohshme.

Studime të mëparshme te brejtësit kishin treguar se ushqyerja brenda një periudhe të kufizuar ditore mund të përmirësojë shëndetin e zemrës dhe të ulë obezitetin, por këto rezultate nuk duket se përkthehen drejtpërdrejt te njerëzit. /GazetaExpress/