Studim i ri: Ankthi mund të jetë një simptomë paralajmëruese e një tumori benign në tru

Keshilla Mjekësore

Gazeta Express

06/10/2025 20:21

Një studim i fundit ka sugjeruar se ankthi, kur shfaqet së bashku me marramendje dhe probleme me ekuilibrin, mund të jetë një tregues i hershëm i një tumori benign në tru.

Tumori i quajtur vestibular schwannoma (VS), i njohur gjithashtu si neuroma akustike, është një formë jo-kancerogjene që zakonisht zhvillohet ngadalë gjatë viteve. Ai prek nervin e dëgjimit dhe të ekuilibrit, duke shkaktuar probleme si humbje të dëgjimit, zhurmë në veshë (tinnitus) dhe marramendje.

Edhe pse tumoret beninje nuk përhapen në pjesë të tjera të trupit, ato mund të bëhen të rrezikshme për jetën pasi rriten brenda një organi delikat si truri.

Lidhja mes ankthit dhe simptomave

Prej kohësh, marramendja dhe vertigoja (ndjesia se gjithçka rrotullohet) janë konsideruar simptomat kryesore që ndikojnë në cilësinë e jetës së pacientëve me këtë tumor. Por studiuesit nga Universiteti i Washingtonit, pas analizimit të të dhënave të 109 pacientëve të diagnostikuar mes viteve 2004 dhe 2025, kanë zbuluar se personat me histori ankthi janë më të ndjeshëm ndaj këtyre simptomave.

Në fakt, pacientët me ankth kishin një rezultat të 14 pikëve më të lartë në testin e “Dizziness Handicap Inventory” – një pyetësor që mat ndikimin e marramendjes në jetën e përditshme. Për çdo pikë shtesë në shkallën e ankthit, rezultati i marramendjes rritej me 2.6 pikë, duke sugjeruar se ankthi përkeqëson simptomat e tumorit.

Çfarë do të thotë kjo për pacientët?

Sipas autorëve të studimit, ky zbulim tregon se ankthi nuk duhet parë vetëm si një çrregullim i veçantë, por edhe si një faktor që mund të rëndojë ndjeshëm pasojat e një tumori në tru. Ata sugjerojnë se ndërhyrje psikologjike, si programet e menaxhimit të stresit përmes “mindfulness”, mund të ndihmojnë në lehtësimin e simptomave tek pacientët me VS.

Ndërkohë, hulumtimi vuri re një fakt interesant: pacientët me humbje dëgjimi shpesh raportonin që marramendja kishte më pak ndikim në jetën e tyre, krahasuar me ata që dëgjimin e kishin ende të paprekur.

Simptomat dhe trajtimi i VS

Përveç marramendjes, simptoma të tjera të zakonshme të këtij tumori përfshijnë:

dhimbje koke të vazhdueshme,

humbje apo turbullim të shikimit,

mpirje ose dobësi në njërën anë të fytyrës,

probleme me koordinimin,

ndryshime në zë ose vështirësi në gëlltitje.

Trajtimi ndryshon në varësi të madhësisë dhe vendndodhjes së tumorit. Në shumë raste, mjekët zgjedhin vetëm monitorimin me rezonancë magnetike (MRI). Nëse tumori rritet, mund të rekomandohet ndërhyrja kirurgjikale, e ndjekur shpesh nga radiokirurgjia stereotaktike për të ndaluar rritjen e mbetjeve tumorale.

Një problem në rritje

Çdo vit në Britani diagnostikohen mbi 12,000 pacientë me tumore në tru, gjysma e të cilëve janë kancerogjene. Tumoret vestibulare janë më të zakonshme tek të rriturit 30–60 vjeç, ndërsa një pjesë e vogël lidhet me një gjendje gjenetike të quajtur neurofibromatoza tip 2 (NF2).

Megjithëse kirurgjia ofron shpesh shërim, rreth 1 në 20 pacientë përjeton rikthim të tumorit, ndaj ndjekja me kontrolle periodike mbetet e domosdoshme. /GazetaExpress/