Specat nga Maqedonia tërhiqen nga tregu në Kroaci për shkak të pesticideve të rrezikshme

Lajme

Gazeta Express

07/10/2025 7:21

Nivele të larta të pesticidit metomil, i cili është i dëmshëm për njerëzit, janë gjetur në specat e kuq të prodhuar në Maqedoninë e Veriut, njoftoi Sistemi Evropian i Sigurisë Ushqimore (RASFF), raportuan mediat rajonale.

Sipas njoftimit zyrtar të kësaj organizate, në specat e importuar në Kroaci nga Maqedonia, pas kontrollit të tregut, është konstatuar përqindje prej 0.049 mg metomil për kilogram.

Përqindja e lejuar e metomilit është 0.01 mg/kg, dhe meqenëse niveli i gjetur ishte pesë herë më i lartë, u urdhërua tërheqja e produkteve nga tregu i Bashkimit Evropian.

Inspektimi i tregut u krye më 23 shtator, ndërsa njoftimi zyrtar u publikua më 3 tetor.

Metomili është një insekticid karbamati i prezantuar në vitin 1966 dhe është i njohur për toksicitet të lartë ndaj njerëzve dhe kafshëve.