Spalletti “bojkoton” mediat para Derbit të Italisë, Juventus dërgon Locatellin në konferencë!

Futboll

Gazeta Express

12/02/2026 16:01

Juventus po përgatitet për një nga ndeshjet më të rëndësishme të sezonit, përballjen e madhe ndaj Interit në “Derby d’Italia” në San Siro, por trajneri Luciano Spalletti ka marrë një vendim të pazakontë para këtij super dueli.

Tekniku bardhezi nuk do të dalë në konferencën tradicionale për shtyp para ndeshjes së Serie A kundër zikaltërve. Në vend të tij, para mediave do të paraqitet kapiteni Manuel Locatelli, i cili do të japë deklaratat zyrtare të premten rreth orës 14:00 GMT (15:00 CET).

Sipas raportimeve nga TMW, arsyeja e këtij vendimi lidhet me kalendarin e ngjeshur të Juventusit. Spalletti është i detyruar të mbajë një konferencë për shtyp të hënën para sfidës së “play-off”-it të Ligës së Kampionëve kundër Galatasarayt. Për të shmangur dy dalje mediatike brenda tre ditësh, klubi ka vendosur që për ndeshjen ndaj Interit të flasë një nga lojtarët lider të skuadrës.

Burimet theksojnë se kjo praktikë mund të vazhdojë deri në fund të sezonit. Madje, pritet që edhe para ndeshjes së ardhshme të Serie A kundër Comos më 21 shkurt, një tjetër lojtar i Juventusit të marrë rolin e përfaqësuesit në konferencë.

Një lëvizje taktike apo një sinjal i qartë për fokus total te fusha? Mbetet për t’u parë nëse kjo strategji do të ndikojë pozitivisht te “Zonja e Vjetër” në javët vendimtare të sezonit. /GazetaExpress