Komiteti për koordinimin dhe vlerësimin e situatës me COVID-19 do të mblidhet sot për të vlerësuar masat që duhet të ndërmerren për menaxhimin e situatës me koronavirus, raporton Express
Kryetari i Asociacionit të Komunave të Kosovës, Sazan Ibrahimi, ka deklaruar për Gazetën Express se kryetarët e komunave kanë kërkuar që të vazhdohet me masat aktuale dhe zbatimin e tyre.
“komunat kërkojnë të vazhdohet me masat aktuale dhe zbatimin e tyre. Kërkohet një mobilizim më i madh i mekanizmave inspektues në nivel vendi, pra mekanizmat komunal dhe qendror së bashku me policinë e Kosovës në zbatimin e masave aktuale”, ka deklaruar Ibrahimi.
Ibrahimi tha se kategorizimi i deritanishëm i komunave sipas shkallës së rrezikshmërisë, ka treguar sukses.
“Kategorizimi me ngjyra i komunave ka dhënë efekte pozitive dhe kërkohet të vazhdohet kështu”, deklaroi Ibrahimi.
Ndryshe, rastet me COVID-19 ditëve të fundit kanë shënuar rritje./Express/