S’mjaftoi humbja nga Barça, Realit i lëndohen edhe dy lojtarë

Sport

Gazeta Express

12/05/2025 16:58

Udhëtimi në Barcelonë të dielën rezultoi një ndeshje për t’u harruar për Real Madridin, pasi jo vetëm që humbën 4-3 dhe i thanë lamtumirë titullit të La Ligës, por gjithashtu pësuan edhe disa dëmtime të rëndësishme.

Vinicius Jr. ishte një nga lojtarët që u detyrua të largohej nga fusha pas një goditjeje, dhe tashmë Real Madridi ka konfirmuar zyrtarisht se ai ka pësuar një dëmtim në kyçin e këmbës.

“Pas testeve të kryera sot ndaj lojtarit tonë Vinicius Jr. nga Shërbimi Mjekësor i Real Madridit, ai është diagnostikuar me një ndrydhje në kyçin e majtë të këmbës. Në pritje të ecurisë së dëmtimit,” thuhet në deklaratën e klubit.

Kjo e përjashton praktikisht Viniciusin nga ndeshja e së mërkurës në La Liga kundër RCD Mallorcës. Tani mbetet për t’u parë nëse ai do të arrijë të rikuperohet në kohë për sfidën e fundjavës kundër Sevillas.

Ndërkohë, Los Blancos kanë njoftuar gjithashtu se edhe mbrojtësi i djathtë, Lucas Vazquez, ka pësuar një dëmtim dhe do të mungojë.

“Pas testeve të kryera sot ndaj lojtarit tonë Lucas Vazquez nga Shërbimi Mjekësor i Real Madridit, ai është diagnostikuar me një dëmtim në muskujt e majtë pektineus. Në pritje të ecurisë së dëmtimit,” konfirmon deklarata e klubit.

Kjo e lë Real Madridin pa një tjetër mbrojtës, pasi ata tashmë kanë humbur Antonio Rüdiger, David Alaba dhe Ferland Mendy për shkak të dëmtimeve, ndërkohë që Dani Carvajal dhe Eder Militao ende nuk janë gati për t’u rikthyer pas mungesave të gjata.

Me Aurelien Tchouameni gjithashtu të pezulluar, kjo e vendos trajnerin në largim, Carlo Ancelotti, përballë shumë pak opsioneve në repartin mbrojtës për ndeshjen kundër Mallorcës të mërkurën.