Sir Alex Ferguson do t’i bashkohet Batistutës dhe legjendave të tjera të Serie A për ndeshjen e lamtumirës së Giuseppe Rossit

Futboll

Gazeta Express

12/02/2025 21:39

Ish-reprezentuesi i Italisë, Giuseppe Rossi, do të luajë ndeshjen e tij të lamtumirës në Firence më 22 mars, ku do të bashkohen disa legjenda të Serie A dhe ish-trajneri i tij te Manchester United, Sir Alex Ferguson.

Rossi u tërhoq nga futbolli në verën e vitit 2023, por ndeshja e tij e fundit do të zhvillohet vetëm muajin e ardhshëm.

Ish-ylli i Fiorentinës do ta përjetojë “vallëzimin e fundit” në një sfidë që do të luhet në Stadio Franchi, Firence, më 22 mars 2025.

Të mërkurën, Rossi njoftoi se shumë nga ish-shokët e tij te Fiorentina dhe disa legjenda të Serie A do të marrin pjesë në këtë event.

Siç raporton Corriere dello Sport, Rossi konfirmoi se mes lojtarëve që do të luajnë janë: Luca Toni, Antonio Cassano, Sebastien Frey, Borja Valero, Gabriel Omar Batistuta, etj.

Rossi gjithashtu zbuloi se Sir Alex Ferguson, ish-trajneri i tij te Manchester United, do të jetë i pranishëm në ndeshje.

Ferguson i dha Rossi-t debutimin në futbollin profesionist me Manchester United në vitin 2004.

“Ai do të jetë aty si trajner gjithashtu. Ishte trajneri im i parë, unë firmosa për Manchester United kur isha 17 vjeç,” tha Rossi.

“Qëndrova vetëm tre vite me të dhe luajta pak, por ai menjëherë pranoi ftesën, gjë që tregon çfarë personi është ai. Nuk bëra shumë te United, por ai më trajton sikur të isha një Ronaldo, që ka shënuar 1,000 gola”.

Rossi luajti për Manchester United nga viti 2004 deri në 2007, duke bërë 14 paraqitje dhe shënuar katër gola në të gjitha garat.

Ndërkohë, me Fiorentinën (2013-2017), ai realizoi 19 gola në 42 ndeshje.

“Do të jetë një mbrëmje e mrekullueshme, një festë për Firencën dhe tifozët e Fiorentinës gjithashtu. Firenca është si një shtëpi e dytë për mua—sa herë që kthehem, ndjej një emocion të veçantë”, tha ai.

“Patëm momente fantastike, si në stadium ashtu edhe jashtë tij. Edhe pse qëndrova vetëm tre vite, ato ishin shumë intensive, me kujtime që do të mbeten në histori, si dhe me momente të vështira, si dëmtimet”.  /GazetaExpress/