“Shumë e rrezikshme”, Belgjika kundërshton përdorimin e aseteve ruse për Ukrainën – Merz dhe Macron kërkojnë vendim të shpejtë në BE

Lajme

Gazeta Express

02/10/2025 23:36

Iniciativa, e promovuar nga kancelari gjerman Friedrich Merz, për të përdorur fondet e ngrira të bankës qendrore ruse për Ukrainën, po has rezistencë masive nga një tjetër lojtar kyç.

Në një samit evropian në Kopenhagen, kryeministri belg Bart De Wever akuzoi mbështetësit e projektit se i kanë neglizhuar rëndë rreziqet dhe se nuk kanë përgjigje për pyetjet e hapura. Ata po futen në ujëra të panjohura.

“Kjo është shumë, shumë e rrezikshme”, tha ai. Përveç rrezikut të shpronësimit të aseteve të kompanive evropiane në Rusi, De Wever, përmendi edhe mundësinë e tentativave të sulmeve kundër kreut të institucionit financiar belg Euroclear.

Ishte kancelari gjerman, Friedrich Merz i cili tha se një vendim mbi përdorimin e aseteve të ngrira ruse për Ukrainën ka të ngjarë të merret në samitin e BE-së pas tre javësh. “Me shumë mundësi do të ketë një vendim konkret për këtë në Këshillin e ardhshëm Evropian pas tre javësh”, tha Merz të enjten në Kopenhagen, në margjinat e diskutimeve të Komunitetit Politik Evropian. “Sidoqoftë, largohem nga Kopenhageni me ndjenjën e fortë se ekziston një marrëveshje shumë e gjerë brenda Bashkimit Evropian dhe gjithashtu brenda Komunitetit Politik Evropian për të ndjekur këtë rrugë. Putini nuk duhet ta nënvlerësojë vendosmërinë tonë”, theksoi Kancelari.

Nga ana e tij, Presidenti francez Emmanuel Macron u ka bërë thirrje shteteve evropiane të ndërmarrin veprime më vendimtare kundër dronëve pushtues rusë. “Është shumë e rëndësishme të dërgojmë një mesazh të qartë: dronët që hyjnë në territorin tonë mbartin një rrezik të madh. Ato mund të shkatërrohen, pikë”, tha Macron në Kopenhagen të enjten. Nuk mund të lëshohet një paralajmërim çdo herë. “Ne do të bëjmë atë që duhet”, tha Macron.

Lidhur me asetet ruse, Macron tha se “ne do të respektojmë të drejtën ndërkombëtare sepse besueshmëria e evropianëve dhe atraktiviteti i Evropës janë në rrezik. Dhe Kryeministri belg ka absolutisht të drejtë që na kujton gjithmonë këto rregulla. Evropa nuk është një kontinent ku dikush mund të sekuestrojë papritur asetet e çdo banke qendrore, kushdo qoftë ajo. Ne respektojmë të drejtën ndërkombëtare”, tha Presidenti francez Emmanuel Macron ndërsa po largohej nga samiti i Komunitetit Politik Evropian në Kopenhagen.