Shtëpia e Bardhë thotë se nevojiten bisedime të mëtejshme midis SHBA-së, Rusisë dhe Ukrainës

Lajme

Gazeta Express

25/11/2025 16:49

Shtëpia e Bardhë tha të martën se kërkohen bisedime të mëtejshme midis Ukrainës, Rusisë dhe Shteteve të Bashkuara, ndërsa po punohet për të arritur një marrëveshje për t’i dhënë fund luftës.

“Gjatë javës së kaluar, Shtetet e Bashkuara kanë bërë përparim të jashtëzakonshëm drejt një marrëveshjeje paqeje duke sjellë si Ukrainën ashtu edhe Rusinë në tryezën e bisedimeve. Ka disa detaje delikate, por jo të pakapërcyeshme, që duhet të zgjidhen dhe do të kërkojnë bisedime të mëtejshme midis Ukrainës, Rusisë dhe Shteteve të Bashkuara”, postoi sekretarja e shtypit e Shtëpisë së Bardhë, Karoline Leavitt, në X.

Komentet e Leavitt i bëjnë jehonë Sekretarit të Shtetit Marco Rubio të dielën, i cili tha në Gjenevë: “Çështjet që mbeten të hapura nuk janë të pakapërcyeshme. Thjesht na duhet më shumë kohë sesa kemi sot”.

Në anën tjetër, bisedimet midis sekretarit të ushtrisë amerikane Dan Driscoll dhe delegatëve të Rusisë mbi një plan të SHBA-së për t’i dhënë fund konfliktit me Ukrainën ‘po shkojnë mirë’, tha zëdhënësi i tij të martën, raporton Agence France-Presse (AFP).

Nënkolonel Jeff Tolbert, zëdhënësi i Driscoll, dha këtë përditësim: “Të hënën vonë dhe gjatë gjithë të martës, sekretari Driscoll dhe ekipi kanë qenë në diskutime me delegacionin rus për të arritur një paqe të qëndrueshme në Ukrainë. Bisedimet po shkojnë mirë dhe ne mbetemi optimistë”, tha ai./Express/