Shqipëria goditet nga tre tërmete në pak ditë

Shqiperi

Gazeta Express

27/06/2025 15:33

Shqipëria është tronditur nga tre tërmete në harkun kohor të vetëm pesë ditëve, duke shkaktuar shqetësim tek banorët, sidomos në Tiranë dhe zonat përreth. Fatmirësisht, nuk raportohet për dëme në njerëz apo materiale.

Tërmeti i parë ndodhi tre ditë më parë, mëngjesin e së martës, rreth orës 05:05, me magnitudë 4.4. Epiqendra u raportua 16 km në veriperëndim të Tiranës, pranë Krujës, në një thellësi të vogël, çka bëri që lëkundjet të ndiheshin qartë në kryeqytet dhe më gjerë.

Dy tërmetet më të fundit ndodhën mëngjesin e së premtes, me dy lëkundje të njëpasnjëshme:

-I pari me magnitudë 4.2

-I dyti me magnitudë 3.8

Sipas Qendrës Sizmologjike Euro-Mesdhetare (EMSC), epiqendra e këtyre dy tërmeteve ishte në zonën e Fushë-Krujës, në një thellësi prej vetëm 5 km, duke bërë që të ndihen ndjeshëm në Tiranë, Durrës dhe zonat përreth.

Institucionet sizmologjike vijojnë të monitorojnë situatën, ndërsa ekspertët theksojnë se këto janë lëkundje normale për rajonin tonë, që ndodhet në një zonë me aktivitet sizmik të moderuar.