Joan Laporta konfirmohet si president i Barçës, fitoi bindshëm ndaj Victor Fontit

Futboll

Gazeta Express

16/03/2026 0:00

Joan Laporta do të shërbejë si president i Barcelonës deri në vitin 2031, pasi fitoi zgjedhjet e mbajtura të dielën.

48,480 anëtarë të klubit votuan në qendrat e votimit në gjithë Kataloninë, në një proces zgjedhor shumë të pritur.

Laporta, 63-vjeçar, doli fitues përballë Víctor Fontit, i cili gjithashtu kishte dalë i dyti edhe në zgjedhjet e vitit 2021.

Në total, 42.34% e votuesve me të drejtë vote morën pjesë, dhe shumica e tyre votuan për Laportën për të vazhduar mandatin e tij të dytë.

Qendrat e votimit u mbyllën në orën 21:00, ndërsa një sondazh i daljes nga votimi i transmetuesit publik “TV3” tregoi se Laporta kishte fituar rreth 66% të votave.

Pas pothuajse 75% të votave të numëruara, Laporta ka fituar pak mbi 68%, kundrejt 29% të kundërkandidatit të tij.

ELECTIONS 2026 🗳💙❤️

ℹ Final stretch of the vote count. pic.twitter.com/cc01r2WwM6

— FC Barcelona (@FCBarcelona) March 15, 2026

Sondazhi përfshinte edhe pyetje për marrëdhënien e ardhshme të Lionel Messi me klubin.

Sipas rezultateve, 55% e të anketuarve besojnë se argjentinasi duhet të rikthehet për një ndeshje lamtumire, 28% mendojnë se ai duhet të emërohet president nderi i klubit, ndërsa 10% sugjerojnë që të rikthehet si lojtar.

Ndërkohë, Marc-André ter Stegen nuk u lejua të votojë pasi emri i tij nuk figuronte në listën elektorale.

Megjithatë, disa lojtarë të Barcelonës shkuan për të votuar pas fitores 5-2 ndaj Sevillës.

Edhe ylli i ekipit të femrave të Barcelonës, Aitana Bonmatí, fituese e trefishtë e Topit të Artë, votoi në “Spotify Camp Nou”.

Ajo deklaroi se ishte një nder të ishte pjesë e një klubi ku anëtarët vendosin në mënyrë demokratike se kush do të jetë presidenti.

Para shpalljes zyrtare të rezultatit, Víctor Fonti pranoi humbjen dhe tha se nuk morën rezultatin që shpresonin, por e respektojnë vendimin e anëtarëve./GazetaExpress/