Shqetësim për Flickun, lojtari i 11-shes kryesore lëndohet në miqësore

Sport

Gazeta Express

04/08/2025 19:00

Barcelona ka shkëlqyer sërish në miqësoren e tretë të turneut të tyre në Azi, duke mposhtur Daegu FC me rezultatin 5-0 në Korenë e Jugut, përpara se të kthehen në Katalonjë. Ishte një mbrëmje kryesisht pozitive për Blaugranat, por një notë e hidhur ishte dëmtimi i mundshëm i Pau Cubarsit.

Mbrojtësi 19-vjeçar po dukej në formë të mirë kundër Daegu-t, duke zhvilluar një paraqitje efikase. Megjithatë, rreth dhjetë minuta para fundit, Cubarsi fitoi një duel për topin dhe pasi e pasoi atë, u ul në gjunjë duke ndjerë dhimbje në këmbën e majtë. Katër minuta para fundit ai vendosi të mos vazhdojë dhe pas ndihmës së stafit mjekësor, u zëvendësua nga Hector Fort për minutat e fundit të ndeshjes.

Gjatë asaj kohe, Cubarsi shihej duke fërkuar dhe treguar zonën rreth gjurit dhe pjesës së sipërme të kërcirit. MD ka konfirmuar se pikërisht aty ndjeu dhimbje mbrojtësi dhe se problemi erdhi pas një përplasjeje me një lojtar të Daegu-t.

Trajneri Hansi Flick ka konfirmuar për mediat se klubi nuk është i shqetësuar për dëmtimin. Ai shpjegoi se ishte vetëm një masë paraprake dhe nuk donte ta rrezikonte Cubarsin, duke theksuar se bëhet fjalë për një goditje dhe jo për një dëmtim muskulor.

Barcelona ka edhe një miqësore të fundit të dielën, ku do të presë Como-n për trofeun Joan Gamper. Kjo ndeshje pritet të japë një pamje më të qartë për planet e Flick në mbrojtje. Ronald Araujo dhe Andreas Christensen janë të gatshëm, ndërsa Jules Kounde, Eric Garcia dhe Gerard Martin gjithashtu mund të luajnë në qendër të mbrojtjes, ndërkohë që Cubarsi nuk pritet të jetë i dëmtuar rëndë.

Inigo Martinez pritet gjithashtu të jetë gati për ndeshjen hapëse të sezonit më 16 gusht kundër RCD Mallorca, edhe pse ende nuk ka luajtur në asnjë ndeshje të parasezonit./GazetaExpress/