Shpërthen vullkani Etna në Siçili

Lajme

Gazeta Express

02/06/2025 12:57

Vullkani më i lartë dhe më aktiv në Evropë, Etna në Siçili, ka shpërthyer fuqishëm sot, duke nxjerrë një shtyllë të madhe tymi dhe hiri në qiellin italian, ndërsa turistët janë parë duke vrapuar për t’i shpëtuar shpërthimit.

Pamje dramatike të publikuara në rrjetet sociale treguan retë e dendura të hirit që mbulonin zonën, ndërsa vizitorët largoheshin me panik nga shpati i malit.

Instituti Kombëtar Italian i Gjeofizikës dhe Vullkanologjisë (INGV) njoftoi se Etna po përjeton shpërthime stromboliane të fuqishme dhe pothuajse të pandërprera, me një intensitet që po rritet në mënyrë të vazhdueshme.

Dridhjet vullkanike që paralajmëruan shpërthimin nisën rreth orës 22:00 të natës së kaluar, duke kulmuar para orës 01:00 të mëngjesit, sipas INGV. Deri tani nuk raportohet për viktima apo dëme të mëdha materiale, por autoritetet kanë rritur nivelin e alarmit dhe kanë kufizuar qasjen në zonat përreth kraterit aktiv.

Etna është një nga vullkanet më të monitoruar në botë dhe ka një histori të gjatë shpërthimesh, shpeshherë spektakolare, por edhe potencialisht të rrezikshme për banorët dhe turistët që e vizitojnë. Autoritetet kanë kërkuar që qytetarët të ndjekin udhëzimet dhe të shmangin zonat e rrezikshme.