Shpejtësia me të cilën ecni mund të tregojë sa mirë do t’i mbijetoni një operacioni

Keshilla Mjekësore

Gazeta Express

04/12/2025 20:52

Shkencëtarët kanë zbuluar se aftësia për të mbajtur një ritëm të rehatshëm ecjeje është një faktor kyç në përcaktimin e suksesit të operacionit dhe shërimit pas tij.

Një studim i ri nga Universiteti Kyushu në Japoni testoi shpejtësinë e ecjes së pacientëve para zëvendësimit të ijes, duke i bërë të ecnin rreth 16 metra. Rezultatet treguan se ata që arrinin një ritëm prej të paktën 1 metri në sekondë (rreth 2.2 mph) kishin gjasë shumë më të lartë të raportonin rezultate pozitive dhe një rikuperim më të butë.

Studiuesit u fokusuan te pacientët me osteoartrit – një gjendje që prek rreth 32 milionë amerikanë dhe shkakton degradimin e kërcit të nyjeve – të cilët kishin nevojë për zëvendësim total të ijes me një protezë artificiale.

Nga të gjithë faktorët e analizuar – si mosha, niveli i dhimbjes, fleksibiliteti i ijes apo forca e këmbëve – shpejtësia e ecjes ishte i vetmi tregues i rëndësishëm që parashikonte rezultate të shkëlqyera pas operacionit.

Pacientët që mbanin një ritëm më të shpejtë para ndërhyrjes kishin gjithashtu më pak gjasa që, vite më vonë, të ndjenin ose të mendonin për protezën e tyre të re.

Pse është kaq e rëndësishme shpejtësia e ecjes?

Shpejtësia e ecjes konsiderohet një “shenjë jetike e përbërë”, që pasqyron:

forcën e këmbëve

stabilitetin dhe koordinimin

nivelin e dhimbjes gjatë lëvizjes

gjendjen kardiovaskulare

Mesatarja e një të rrituri të shëndetshëm është rreth 1.3 m/s (3 mph).

Studimi tregon se një test i thjeshtë ecjeje para zhvendosjes së pacientit në tryezën e operacionit është mënyra më e sakta për të parashikuar dhimbjen dhe funksionin fizik një vit pas zëvendësimit të ijes.

Dr. Yuki Nakao, ortoped dhe autori kryesor, u shpreh:

“Thjeshtësia e këtij testi e bën atë një mjet praktik që mund të përdoret lehtësisht në çdo vlerësim paraoperativ.”

Si u zhvillua studimi?

Studiuesit ndoqën 483 pacientë me osteoartrit. Para operacionit, terapistët fizikë matën:

dhimbjen

diapazonin e lëvizjes së ijes

forcën e gjymtyrëve të poshtme

shpejtësinë e ecjes në një distancë 10 metra

Operacionet u kryen mes viteve 2012 dhe 2018. Në gusht 2023, të gjithë pacientëve iu dërguan pyetësorë, ku u përgjigjën 274 prej tyre. Vlerësimet përfshinin:

Oxford Hip Score, që mat funksionin dhe dhimbjen

Forgotten Joint Score-12, që tregon sa shpesh pacienti e ndjen protezën e tij të ijes

Me ndihmën e një algoritmi të inteligjencës artificiale, pacientët u ndanë në grupe sipas rezultateve të tyre afatgjata. U identifikua një grup i veçantë me “rezultate të shkëlqyera” – pacientë me dhimbje minimale, funksion të lartë dhe pothuajse asnjë ndjesi të protezës gjatë jetës së përditshme.

Analiza e të dhënave tregoi se shpejtësia e ecjes para operacionit ishte faktori i vetëm që parashikonte anëtarësimin në këtë grup.

Cila është shpejtësia ideale?

>1.0 m/s → Pacientët kishin gati 6 herë më shumë gjasa të rezultonin me shërim të shkëlqyer

0.7 m/s → Shpejtësi minimale për të arritur rezultate “të pranueshme”

Ritmi prej 1 m/s ishte veçanërisht i lidhur me pacientët që “harronin” se kishin një ije artificiale – standardi më i lartë i suksesit.

Studimi gjeti gjithashtu se fleksibiliteti i mirë i ijes, muskujt më të fortë dhe niveli më i ulët i dhimbjes lidhen drejtpërdrejt me ecjen më të shpejtë. Të tre këta faktorë janë të ndryshueshëm, çka do të thotë se pacientët mund të përmirësojnë gjasat e tyre para operacionit përmes ushtrimeve.

Nakao shtoi:

“Shpresojmë që këto gjetje të inkorporohen në praktikën klinike për rezultate më të mira tek pacientët që i nënshtrohen zëvendësimit të ijes.”

Studimi u publikua në Journal of Bone & Joint Surgery.

Ecja si pjesë e përgatitjes para operacionit

Mjekët zakonisht rekomandojnë program ushtrimesh për pacientët që do t’i nënshtrohen zëvendësimit të ijes.

Një studim italian i vitit 2020 madje tregoi se ecja e shpejtë rreth 10 metrash ditën e operacionit përshpejtoi shërimin dukshëm:

Pacientët arritën pavarësi funksionale 4 ditë më herët sesa ata që nisën ecjen një ditë pas operacionit

Nuk u vërejtën efekte anësore – as më shumë dhimbje, as funksion i kufizuar

Për detyrat e kujdesit ndaj vetes, si ushqimi, higjiena dhe veshja, grupi që eci para operacionit kishte një avantazh prej një jave. /GazetaExpress/