Shkencëtarja zbulojnë ‘trukun’ që mund të rrisë shanset për të lindur një djalë

Shneta tjera

Gazeta Express

29/01/2025 21:08

Një matematikane britanike ka zbuluar një ‘truk’ të habitshëm që mund t’i bëjë gratë shtatzëna më të prira për të lindur një djalë.

Profesorja Hannah Fry ndau një teori interesante në Instagram, e njohur si “efekti i ushtarit të kthyer,” që tregon një rritje të lindjeve të djemve pas përfundimit të luftërave botërore.

Duke iu referuar një grafiku mbi raportin e lindjeve të djemve dhe vajzave në Angli dhe Uells, ajo shpjegoi:

“Ka disa kulme të qarta – një në vitin 1919, menjëherë pas përfundimit të Luftës së Parë Botërore, dhe një tjetër në 1945, pas Luftës së Dytë Botërore.”

Akademikja dhe prezantuesja televizive tha se ky fenomen lidhet me një kombinim faktorësh socialë dhe një veçori biologjike që rrit shanset për të pasur një djalë nëse ngjizja ndodh herët gjatë “dritares së pjellorisë” së një gruaje.

Sipas profesoreshës Fry, pas luftërave, njerëzit kanë më shumë marrëdhënie seksuale, pasi ushtarët kthehen tek bashkëshortet apo të dashurat e tyre, gjë që rrit ndjeshëm mundësinë për të mbetur shtatzënë.

View this post on Instagram

A post shared by Hannah Fry (@fryrsquared)

Ky intensifikim i marrëdhënieve seksuale bën që gratë të mbeten shtatzënë më herët gjatë ciklit të tyre menstrual, dhe sipas profesoreshës Fry, kjo mund të sjellë një rritje të lindjeve të djemve.

“Shanset që një grua të ngjizë një fëmijë mashkull ose femër ndryshojnë në mënyrë shumë të lehtë në varësi të momentit të ngjizjes gjatë ciklit të saj,” tha ajo. “Nëse ngjizja ndodh pak më herët, shanset për të pasur një djalë rriten paksa.”

Ekspertët mendojnë se kjo ndodh për shkak të ndryshimeve hormonale ose të niveleve të aciditetit në trupin e gruas gjatë ciklit menstrual, të cilat mund të ndikojnë në mjedisin e qafës së mitrës.

Këto ndryshime krijojnë kushte më të favorshme për spermatozoidët që mbajnë kromozomin Y (që përcakton gjininë mashkullore) për të arritur të parët te veza.

Studime të tjera sugjerojnë se ky çekuilibër mes lindjeve të djemve dhe vajzave mund të vijë nga një vdekshmëri pak më e lartë e embrioneve femërore në krahasim me ato mashkullore.

Megjithatë, profesorja Fry paralajmëroi se ata që duan të përdorin këtë metodë për të ndikuar në gjininë e foshnjës së tyre nuk kanë një garanci të sigurt.

“Në nivel individual, rritja e mundësisë për të pasur një djalë është shumë e vogël,” shpjegoi ajo – transmenton GazetaExpress. “Por kur analizojmë të dhënat në nivel popullsie, ky model bëhet më i dukshëm.”

Efekti i ushtarit të kthyer, pavarësisht emrit, nuk lidhet gjithmonë me luftërat, theksoi profesorja Fry.

Një tjetër rritje e lindjeve të djemve u regjistrua në Britani në vitin 1973, gjatë një krize energjetike, kur shumë njerëz punonin vetëm disa ditë në javë.

“Mendoj se tani e dimë se çfarë po bënte shumica e britanikëve gjatë javës së tyre tre-ditore të punës,” tha me humor profesorja Fry.

Edhe pse “efekti i ushtarit të kthyer” është një fenomen i vërtetë, vlen të theksohet se edhe në kohë normale lindin pak më shumë djem sesa vajza.

Në përgjithësi, në një popullsi lindin rreth 104 djem për çdo 100 vajza.

Ky raport nuk ndikon në ekuilibrin e popullsisë, pasi statistikat tregojnë se pak më shumë djem vdesin para se të arrijnë moshën e rritur, kryesisht nga aksidentet apo problemet zhvillimore. /GazetaExpress/