Sherr mes të rinjve në Shkodër, plagoset rëndë me thikë 20-vjeçari, policia: Ja si nisi konflikti jashtë një lokali - Gazeta Express

Sherr mes të rinjve në Shkodër, plagoset rëndë me thikë 20-vjeçari, policia: Ja si nisi konflikti jashtë një lokali

Ballina

Gazeta Express

02/08/2020 12:31

Një sherr mes dy të rinjve ka ndodhur mbrëmjen e kaluar në Shkodër, i cili ka përfunduar në përdorimin e armëve të ftohta.

Policia e Shkodrës ka zbardhur ngjarjen, ku u plagos me mjet prerës 20-vjeçari, i cili ndodhet në gjendje të rëndë në spital.

Në pranga ka rënë autori i plagosjes, 24-vjeçari K. H., banues në fshatin Grudë e Re, Shkodër. Sipas uniformave blu, sherr mes të rinjve ka nisur jashtë një lokali, ku 24-vjeçari pas një konflikti verbal me fjalë ka plagosur me mjet prerës (thikë) shtetasin E. Gj. 20 vjeç.

Njoftimi i policisë:

Arrestohet në flagrancë autori i dyshuar i ngjarjes.

Nga strukturat e DVP Shkodër në bashkëpunim me Komisariatin e Policisë Shkodër, pas njoftimit të marrë se shtetasi E. Gj., është plagosur me mjet prerës (thikë), menjëherë shërbimet policore janë vënë në ndjekje për identifikimin dhe kapjen e autorit të kësaj ngjarje.

Nga veprimet hetimore intensive të bëra, është bërë e mundur dokumentimi i plotë ligjor i kësaj ngjarje kriminale, ku është arrestuar në flagrancë autori i dyshuar konkretisht shtetasi K. H.,24 vjeç, banues në fshatin Grudë e Re, Shkodër.

Nga provat e grumbulluara ka rezultuar se konflikti ka ndodhur në ambientet e jashtme të një bar-kafeje në lagjen Skënderbeg, në Shkodër, ku ky shtetas pas një konflikti verbal me fjalë ka plagosur me mjet prerës (thikë) shtetasin E. Gj. 20 vjeç, banues në fshatin Grudë e Re, Shkodër, i cili aktualisht ndodhet në gjendje të rëndë, në Spitalin Rajonal Shkodër.

Materialet iu referuan Prokurorisë së Rrethit Gjyqësor Shkodër, për veprat penale “Vrasja me paramendim, mbetur në tentativë” dhe “Mbajtja pa leje e armëve të ftohta”.