Shefi i BE-së aludon që Kuvendi s’është konstituuar: Të respektohen proceset kushtetuese dhe institucionet multietnike

Lajme

Gazeta Express

05/09/2025 9:58

Shefi i Zyrës së BE-së në Kosovë, Aivo Orav, ka takuar kryetarin e ri të Kuvendit, Dimal Basha, me të cilin tha se e ka diskutuar nevojën “për respektim të proceseve kushtetuese” dhe për “institucione multietnike” pasi Basha e shpalli Kuvendin të konstituuar edhe pa zgjedhjen e nënkryetarit serb – siç kërkohet me Kushtetutë.

Orav i tha Bashës që BE-ja do t’i ndihmojë Kosovës, ndërsa tha se formimi i Qeverisë dhe krijimi i komisioneve parlamentare është kyç për përfitimin e fondeve nga Plani i Rritjes, të cilat kanë mbetur peng për shkak të zvarritjes së formimit të Kuvendit e Qeverisë.

“U takova sot me Kryetarin e sapozgjedhur të Kuvendit të Kosovës, Dimal Basha. Diskutuam për nevojën për të respektuar proceset kushtetuese dhe për të siguruar institucione gjithëpërfshirëse dhe multietnike. BE është këtu për të mbështetur Kosovën – formimi i Qeverisë dhe komisioneve të Kuvendit është kyç për të ecur përpara me Planin e Rritjes”, tha ai.

Orav shtoi se presin “me padurim që këto zhvillime dhe Plani i Rritjes të sjellin përfitime konkrete socio-ekonomike për popullin e Kosovës përmes ndihmës shtesë financiare, integrimit ekonomik dhe reformave të përshpejtuara”./Express/

Met the newly elected 🇽🇰 Assembly Speaker Dimal Basha today.

We discussed the need to respect constitutional processes, ensuring inclusive, multi-ethnic institutions.

The 🇪🇺 is here to support 🇽🇰-the formation of the Gov. &AoK committees is key to progressing w/the #GrowthPlan. pic.twitter.com/0iN3zPQOtG

— Aivo Orav (@AivoOrav) September 4, 2025