Seriale njëminutëshe, mania e re e Hollivudit

Arte

Gazeta Express

18/02/2026 19:52

Nëse ende nuk keni dëgjuar për dramat vertikale, ka shumë gjasa që së shpejti do t’i hasni kudo. Këto seriale ultra të shkurtra – zakonisht me episode rreth një minutë – janë rritur me ritme marramendëse vitet e fundit dhe tashmë kanë tërhequr seriozisht vëmendjen e Hollivudit.

Vitin e kaluar, ish-drejtoresha e Showtime, Jana Winograde, njoftoi krijimin e MicroCo, një studio e dedikuar vetëm për drama vertikale, duke thënë se ishte e befasuar nga numri i madh i talenteve të nivelit të lartë që i janë afruar. Pak më herët, ish-shefi i Miramax, Bill Block, lançoi GammaTime, me premtimin për mikrodrama origjinale nga krijuesi i CSI-së, Anthony E. Zuiker.

“Kreu i çdo studioje të madhe në Hollivud ose është përfshirë, ose po e teston këtë format,” thotë konsulentja e dramave vertikale Jen Cooper. Në një treg argëtimi që po stagnon, këto seriale janë ndër të paktat zona me rritje reale: vitin e kaluar, të ardhurat në këtë sektor u rritën me rreth 8,000% nga viti në vit.

Drama vertikale quhen kështu sepse xhirohen në format 9:16 – më të gjata se të gjera – perfekte për telefonat inteligjentë. Xhirimet bëhen shpejt, shpesh brenda një jave, me ekipe të vogla dhe aktorë që duhet të godasin saktë që në dy-tri dubla. Ritmi është frenetik: histori që kalojnë nga një “cliffhanger” te tjetri çdo pak sekonda, me synimin e vetëm për t’ju mbajtur të ngjitur pas ekranit.

Sipas Cooper, suksesi lidhet edhe me një publik të neglizhuar prej kohësh: gratë që lexojnë romane romantike. “Nuk është The Godfather, por plotëson një boshllëk dhe i gjen njerëzit aty ku janë – në telefon.”

Por a janë vërtet të mira? Mjafton të shkarkoni aplikacione si ReelShort ose DramaBox dhe do të përballeni me tituj absurdë, ku pothuajse të gjithë personazhet janë miliarderë, historitë janë të ekzagjeruara dhe ngjarjet shpërthejnë pa pushim. Ka diçka hipnotike në këtë kaos.

Disa shembuj që tregojnë ku ndodhet sot ky zhanër:

Breaking the Ice (ReelShort)

Një hit global, sidomos në Azi. Brenda minutës së parë ka shtatzëni, shuplaka, oferta parash dhe drama ekstreme. E çmendur, pa shumë logjikë – por çuditërisht argëtuese. Sapo nis një skenë dushi, aktivizohet “paywall”-i: për të vazhduar duhet të grumbullosh monedha ose të paguash.

How to Tame a Silver Fox (ReelShort)

Një romancë me diferencë moshe që u bë virale në TikTok. Histori problematike, personazhe plot “flamuj të kuq” dhe një estetikë që synon shije shumë specifike.

American Sniper: The Last Round (ReelShort)

Një përpjekje për të tërhequr audiencë mashkullore, por që përfundon si një karikaturë aksioni, pa lidhje me filmin e Clint Eastwood-it. Budallaqe, por tipike për orët e vona të natës.

Spark Me Tenderly (My Drama)

Romancë erotike në stilin Fifty Shades of Grey: kontrata BDSM, tension seksual dhe një fund sentimental. E cekët, por me audiencë të madhe.

In Other Words, I Love You (DramaBox)

Një histori rinore shumë më e balancuar, me kast të fortë dhe ritëm më të natyrshëm. Një shembull se si dramat vertikale mund të evoluojnë drejt cilësisë.

Game of Choice (Tallflix)

Një dramë aksioni në frymën e Squid Game, e ngjeshur në format vertikal. Ambicioze dhe dëshmi se ky medium po kërkon të dalë nga margjinat.

Drama vertikale mund të duken si argëtim i lehtë – “diçka që do ta shihje i dehur në 2 të mëngjesit” – por ritmi i rritjes dhe investimet serioze tregojnë se ky format ka ardhur për të qëndruar. Dhe me gjithnjë e më shumë kineastë të vërtetë që përfshihen, pritet që standardet të rriten shpejt. /GazetaExpress/