Serbi – Shqipëri, Lorik Cana ju jep avantazh serbëve, e tregon arsyen

Futboll

Gazeta Express

11/10/2025 13:21

Kapiteni legjendar i kombëtares së Shqipërisë, Lorik Cana ka folur për ndeshjen Serbi – Shqipëri që do të luhet sonte në Leskovc, me fillim nga ora 20:45.

Cana i ka dhënë një përparësi të vogël kombëtares serbe për këtë takim, teksa ka bërë me dije arsyen se pse mendon kështu.

“Serbia nuk është në ditën më të vështirë, mund të themi se s’është në ditë të mirë. Ndeshja është e hapur, 50-50. E shikoj një avantazh nga ana e tyre sepse luajnë për dy rezultate. Ne kemi gabuar ndaj Letonisë. Sa i takon dëshirës për fitore, do jetë e njëjtë për të dyja skuadrat”, ka thënë ai për “Sport News”.

Ish-lojtari i kombëtares u shpreh po ashtu se e ardhmja e Sylvinhos nuk duhet të varet nga ndeshja Serbi – Shqipëri. Sipas tij, vlerësimi duhet të bëhet në fund të edicionit.

“Nuk besoj se ka për të patur një ndryshim në krye të ekipit kombëtar. Duhet parë se si do përfundojë ky edicion, për të vendosur më pas.  Në ndeshjen e parë nuk u pa ndonjë diferencë e madhe. Vërtet ajo ndeshja e parë nuk e kishte atë tensionin, por le të shikojmë nga një aspekt tjetër”, ka thënë tutje Cana.

Shqipëria e Serbia janë ndeshur një herë tashmë në kuadër të kualifikimeve për Botëror, me ndeshjen që u luajt në Tiranë më 7 qershor të këtij viti. Ndeshja përfundonte 0-0 pas 90 minutave./GazetaExpress/