Serbi – Shqipëri, drejtuesit e dy Federatave hanë drekë bashkë në Nish para ndeshjes së sontme

Futboll

Gazeta Express

11/10/2025 14:13

Në prag të ndeshjes së madhe Serbi – Shqipëri, që luhet në kuadër të kualifikimeve të Botërorit 2026, në qytetin e Nishit është mbajtur dreka zyrtare e organizuar nga Federata Serbe e Futbollit.

Në këtë event mori pjesë delegacioni i Federatës Shqiptare të Futbollit, i kryesuar nga kryetari Armand Duka, ndërsa nga pala serbe ishin të pranishëm Kryetari i Federatës së Futbollit të Serbisë, Dragan Džajić, dhe disa zyrtarë të tjerë të lartë të institucionit.

“Takimi u zhvillua në një atmosferë miqësore dhe me frymën e mirë të bashkëpunimit sportiv mes dy federatave, duke vënë në plan të parë respektin e ndërsjellë dhe vlerat që përcjell futbolli si urë bashkimi mes popujve”, shkruan FSHF-ja.

“Gjithashtu, Presidenti Duka vlerësoi masat e marra për organizimin e ndeshjes nga federata dhe autoritetet serbe dhe për pritjen shumë të mira që i është rezervuar Kombëtares shqiptare dhe delegacionit të FSHF”, vazhdon komunikata e FSHF-së.

Ndeshja Serbi – Shqipëri luhet sonte me fillim nga ora 20:45, dhe zhvillohet në stadiumin “Dubocica” në Leskovc.

Shqipëria është e dyta në grupin K, me tetë pikë të tubuara nga pesë ndeshje. Serbia është e treta me shtatë pikë, por edhe me një ndeshje më pak.

Anglia e kryeson grupin me 15 pikë nga pesë ndeshje.

Letonia i ka katër pikë, teksa Andorra është e fundit me asnjë pikë./GazetaExpress/