Sekuestrohen 9000 m2 tokë në Fushë-Prezë, Prokuroria: Altin Topalli e përvetësoi përmes mashtrimit dhe e shiti

Shqiperi

Gazeta Express

04/06/2025 13:37

Prokuroria e Tiranës ka sekuestruar 9000 m2 tokë në Fushë-Prezë, e cila u përvetësua në mënyrë të paligjshme nga Altin Topalli. Sipas prokurorisë, ky person ka arritur që të përvetësojë nëpërmjet mashtrimit dhe shpërdorimit të besimit tokën, dhe më pas e ka shitur për përfitime monetare.

Hetimet nisën pas kallëzimit të një personi me inicialet M.D, se toka arë e gjyshit të tij nuk figuronte më si pasuri e familjes së tij. Rezultoi se toka kishte kaluar në pronësi të Altin Topallit edhe pse pronarë ishte e gjithë familja dhe nuk mund të shitej apo përvetësohej pa miratimin dhe pëlqimin e të gjithëve.

I pyetur për blerjen, Topalli ka dhënë dy versione të ndryshme, njëherë se prona ka qenë e babait të tij dhe se ai dispononte dokumentacionin e vjetër dhe më pas ka deklaruar se e ka blerë. Ai ka pretenduar se e ka blerë për 450 mijë euro, por sipas Prokurorisë, nuk ka të ardhura që mund të justifikojnë këtë blerje. Këtë tokë, më pas, ai e ka shitur te një person tjetër, për vlerën 100 mijë euro. Sipas prokurorisë, ka rezultuar, se Topalli e përvetësoi tokën duke mashtruar një familjar të familjes që ishte në pronësi toka, konkretisht H.D.  

“Nga dokumentacionet e administruara, rezulton se shtetasi A.T. zotëronte këtë pasuri. I pyetur për blerjen, shtetasi A.T. ka dhënë dy versione për pasurinë, një herë se prona ka qenë e babait të tij dhe ai disponon dokumentacion të vjetër dhe më pas ka deklaruar se e ka blerë. Ndërkohë që nuk ka të dhëna se shtetasit e mësipërm kanë pasur aftesi paguese dhe burim për të paguar shumën e parave prej 62.203.500 leke apo (450.000 Euro) të paguar për blerjen e pasurisë.Kete pasuri shtetasi A.T. ia dhuron në vitin 2016 shtetases B.V, e përfaqësuar me prokurë nga A.V. Ky shtetas shpjegoi se pasurinë e mësiperme e ka blerë në vlerën 100.000 Euro nga A.T.  Nga tërësia e hetimit, rezultoi se shtetasi A.T. ka mashtruar shtetasin H.D., duke i marrë pasurinë dhe duke e kaluar në pronësi të tij.”, thotë prokuroria. 

Njoftimi i plotë Prokurorisë:

Përvetësoi padrejtësisht tokën dhe e shiti për të përfituar, Prokuroria e Tiranës sekuestron 9000m2 tokë arë në Fushë-Prezë

Me kërkesë të Prokurorisë pranë Gjykatës së Shkallës së Parë të Juridiksionit të Përgjithshëm Tiranë u sekuestruan 9000 m2 tokë arë në Fushë Prezë.

Në kuadër të hetimit mbi procedimin penal nr.2754 të vitit 2025 të regjistruar për ‘Mashtrim’ dhe ‘Pastrim i produkteve të veprës penale’, rezultoi se shtetasi A.T. arriti të përvetësojë nëpërmjet mashtrimit dhe shpërdorimit të besimit 9000m2 tokë dhe më pas e ka shitur për përfitime monetare.

Hetimet nisën pasi shtetasi M.D. kallëzoi në prokurori se toka arë e gjyshit të tij e përfituar me ligjin nr.7501, nuk figuronte më si pasuri e familjes së tij.

Nga hetimet, u arrit në konkluzionin se kjo pasuri kishte kaluar në pronësi të shtetasit A.T. edhe pse pronarë kanë qenë e gjithë familja dhe pasuria nuk mund të shitej apo tjetërsohej, pa miratimin dhe pëlqimin e anëtarëve të tjerë të familjes bujqësore, të cilët kanë qenë pjesë e saj në vitin 1992.

Nga dokumentacionet e administruara, rezulton se shtetasi A.T. zotëronte këtë pasuri. I pyetur për blerjen, shtetasi A.T. ka dhënë dy versione për pasurinë, një herë se prona ka qenë e babait të tij dhe ai disponon dokumentacion të vjetër dhe më pas ka deklaruar se e ka blerë. Ndërkohë që nuk ka të dhëna se shtetasit e mësipërm kanë pasur aftesi paguese dhe burim për të paguar shumën e parave prej 62.203.500 leke apo (450.000 Euro) të paguar për blerjen e pasurisë. Kete pasuri shtetasi A.T. ia dhuron në vitin 2016 shtetases B.V, e përfaqësuar me prokurë nga A.V. Ky shtetas shpjegoi se pasurinë e mësiperme e ka blerë në vlerën 100.000 Euro nga A.T.

Nga tërësia e hetimit, rezultoi se shtetasi A.T. ka mashtruar shtetasin H.D., duke i marrë pasurinë dhe duke e kaluar në pronësi të tij.