Sekretari amerikan i Thesarit thotë se e konsideron Putinin kriminel lufte

Lajme

Gazeta Express

08/05/2025 12:52

Sekretari amerikan i Thesarit, Scott Bessent, e quajti të mërkurën presidentin rus Vladimir Putin një “kriminel lufte”, ndërsa ligjvënësit i bënë presion mbi politikën e administratës Trump për të shtyrë Ukrainën në dialog me udhëheqësin rus.

Bessent u pyet konkretisht nga kongresisti Juan Vargas, anëtar i lartë i Task Forcës së Komitetit të Shërbimeve Financiare të Dhomës së Përfaqësuesve për Politikën Monetare, gjatë seancës dëgjimore të Komisionit, nëse ai do të negocionte me një kriminel lufte, transmeton Telegrafi.

“Mendoj se kjo është natyra e diplomacisë kur duhet të negociohet me të dyja palët. Unë besoj se negociatat ishin të nevojshme me japonezët pas Luftës së Dytë Botërore”, u përgjigj Bessent.

Kur u pyet drejtpërdrejt nëse e konsideronte Putinin një kriminel lufte, Bessent u përgjigj: “Po”.

Gjatë dëshmisë së tij, Bessent foli gjithashtu për politikën e administratës Trump për përdorimin e sanksioneve dhe “mbytjen” e linjave financiare të terroristëve, kriminelëve dhe hakerëve nga Meksika dhe Guatemala në Kinë dhe Iran.

Kur u pyet për Rusinë, Bessent theksoi përgjigjen e SHBA-së ndaj të ardhurave të Moskës nga karburantet fosile, të cilat mbështesin luftën e saj kundër Ukrainës.

Ai gjithashtu kritikoi “sanksionet e dobëta” të administratës Biden ndaj Rusisë, duke vënë në dukje se ato synonin vetëm kompanitë e naftës të nivelit më të ulët dhe vendosën një kufizim çmimesh që dështoi.

Theksoi suksesin e administratës Trump, në uljen e çmimeve të naftës dhe ndikimin e të ardhurave të reduktuara ruse në përpjekjet e tyre të luftës.