Samiti për Planin e Rritjes në Shkup, del një fotografi, Kurti e Rama aty, Vuçiq pritet të shkojë sot?

Lajme

Gazeta Express

01/07/2025 9:33

Sot në Shkup, do të mbahet takimi i liderëve BE–Ballkani Perëndimor, kushtuar Planit për Rritje. Në orën 9:30 parashikohet mbërritja dhe pritja zyrtare e liderëve të Ballkanit Perëndimor. Në orën 10:00 do të fillojë paneli i parë kushtuar Planit për Rritje të Ballkanit Perëndimor.

Fjalime hyrëse do të mbajnë kryeministri Hristijan Mickoski dhe komisionerja për Zgjerim, Marta Kos.

Është publikuar edhe një foto e liderëve që do të marrin pjesë në këtë takim. Në mesin e tyre shihet kryeministri në detyrë i Kosovës Albin Kurti si dhe ai i Shqipërisë Edi Rama. Ndërkohë, raportohet se presidenti serb pritet të shkojë sot në këtë samit.

Kurti, dhe Presidenti i Serbisë, Aleksandar Vuçiq, do të jenë ndër folësit kryesorë në samitin dyditor në Shkup.

Ministri i Punëve të Jashtme dhe Tregtisë së Jashtme Timço Mucunski dje ka publikuar edhe pamje nga prita që i ka bërë secilit pjesmarrës në këtë takim.

“Sonte pata nderin të pres liderët e vendeve të Ballkanit Perëndimor dhe BE-së. Shkupi organizon një ngjarje të rëndësishme, dhe shfrytëzojmë rastin për të lobuar për interesat dhe politikat maqedonase!”, ka shkruar ai.

Ky takim i nivelit të lartë synon të forcojë bashkëpunimin ekonomik, të nxisë reformat dhe të përshpejtojë integrimin e vendeve të rajonit drejt Tregut të Përbashkët Rajonal, në bashkëpunim me institucionet financiare ndërkombëtare.

Plani për Rritje për Ballkanin Perëndimor prej 6 miliardë eurosh u miratua nga Komisioni Evropian me 8 nëntor 2023. Ai bazohet në katër shtylla: forcimi i integrimit ekonomik në tregun unik të BE-së; forcimi i integrimit ekonomik brenda Ballkanit Perëndimor përmes tregut të përbashkët rajonal; përshpejtimi i reformave fundamentale dhe rritja e asistencës financiare për të ndihmuar reformat.

Për Maqedoninë e Veriut janë të dedikuara 750 milionë euro.