Sa u dënuan veç e veç të akuzuarit në rastin Syri i Popullit

Gazeta Express

22/01/2020 10:13

Gjykata Themelore në Prishtinë sot ka marrë vendim për shtatë të akuzuarit në rastin e njohur si Syri i Popullit, raporton Televizioni T7

Sipas këtij vendimi, Avni Llumnica dënohet me 12 vjet burg, Sadri Ramabaja me 5 vjet, Ragip Sallova 4 vjet, Bajrush Konjusha 3 vjet, Halim Halimi 3 vjet, Rexhep Topllana 2 vjet, Behxhet Lluzha 2 vjet.

Për Murat Jasharin, ndërkaq, Gjykata ka vendosur 10 vjet trajtim të detyrueshëm psikiatrik. Akuza është refuzuar për Sabit Berishën dhe Lirije Luzhën.

Në rastin “Syri i Popullit” kishin dëshmuar edhe presidenti i vendit, Hashim Thaçi dhe ish-kryetari i Kuvendit të Kosovës, Kadri Veseli.

Në këtë rast akuzoheshin Avni Llumnica, Ragip Sallova, Sadri Ramabaja, Behxhet Luzha, Halim Halimi, Bajrush Konjusha, Murat Jashari dhe Rexhep Topllana për vepra penale përgatitje të veprave terroriste ose vepra penale kundër rendit kushtetues dhe sigurisë së Republikës së Kosovës.

Javën e kaluar, të akuzuarit dhanë fjalën e tyre përfundimtare.

Sadri Ramabaja e cilësoi procesin si të montuar politikisht, ndërsa vetë prokurorin si të ndikuar.

Ai deklaroi se i gjithë procesi ishte inskenuar nga klani “Pronto”. Prokurori Sylë Hoxha në fjalën e tij përfundimtare ka kërkuar që të akuzuarit të shpallen fajtorë.

Hoxha hoqi dorë nga ndjekja penale për Lirije Luzhën dhe Sabit Berishën të cilët ishin të dyshuar në këtë rast. /GazetaExpress/