Sa shpesh duhet ta ndërroni furçën e dhëmbëve?

Keshilla Mjekësore

Gazeta Express

25/02/2026 19:29

Furça e dhëmbëve është një objekt i përditshëm, i pranishëm në pothuajse çdo banjë. Megjithatë, një pyetje e thjeshtë vazhdon të ndajë njerëzit: sa shpesh duhet ta ndërroni atë?

Debati ka qenë i gjallë prej vitesh në Reddit, ku përdoruesit japin përgjigje shumë të ndryshme – nga një herë në muaj deri te “kur duket qartë e konsumuar”.

Së fundmi, Primrose Freestone, profesoreshë e asociuar e mikrobiologjisë klinike në University of Leicester, ka dhënë një përgjigje të qartë: furça e dhëmbëve duhet ndërruar çdo tre muaj, përveç rasteve kur keni infeksione në gojë ose në mishrat e dhëmbëve.

Në një intervistë për Daily Mail, ajo shpjegon se:

“Një furçë e re duhet ndërruar çdo tre muaj. Por nëse keni infeksione orale apo të mishrave, duhet ta ndërroni më shpesh për të shmangur riinfektimin.”

Sipas saj, problemi kryesor nuk është gjithmonë sa shpesh e ndërroni furçën, por mënyra se si e pastroni dhe e ruani atë ndërmjet përdorimeve. Mbetjet ushqimore që mbeten pas larjes së dhëmbëve krijojnë kushte të favorshme për rritjen e baktereve dhe kërpudhave.

“Goja e njeriut përmban mbi 500 lloje bakteresh dhe kërpudhash. Disa prej tyre përfundojnë në furçën e dhëmbëve sa herë që lani dhëmbët, prandaj pastrimi i furçës është thelbësor,” thekson ajo.

Edhe shumë përdorues të Reddit pajtohen me këtë këshillë, duke thënë se e zëvendësojnë furçën kur fijet duken të konsumuar – zakonisht rreth tre muaj – ose nga frika e grumbullimit të baktereve. Megjithatë, ka edhe nga ata që mendojnë se furça mund të përdoret pa problem deri në një vit, nëse duket ende “në gjendje të mirë”.

Dr Freestone mbështet edhe udhëzimet e NHS, të cilat rekomandojnë ndërrimin e furçës çdo tre muaj. Por ajo shton se shumica e njerëzve nuk kujdesen siç duhet për furçën e tyre pas përdorimit.

Sipas saj, furça duhet shpëlarë nën ujë të nxehtë për të paktën 30 sekonda, për të hequr pastën e dhëmbëve, bakteret dhe mbetjet ushqimore. Për një pastrim më të thellë, ajo sugjeron:

njomje për rreth 30 minuta në sodë buke, peroksid hidrogjeni ose shpëlarës antibakterial për gojën;

ose ekspozim për rreth një minutë në avull të nxehtë.

Si mikrobiologe, ajo shkon edhe më tej: një herë në javë, lan furçën e saj me sapun antibakterial për duar, për të eliminuar çdo mikrob që mund t’i ketë shpëtuar larjes me ujë të nxehtë. Gjithashtu, ajo këshillon që furça të mos mbahet pranë tualetit, pasi spërkatjet gjatë shkarkimit të ujit mund ta ndotin me baktere fekale.

Përfundimi i ekspertëve është i qartë: ndërrimi çdo tre muaj dhe higjiena e duhur e furçës janë po aq të rëndësishme sa vetë larja e dhëmbëve. /GazetaExpress/