Sa i “vjetër” është zemra juaj? Kalkulatori online tregon rrezikun e sëmundjeve të zemrës për 30 vitet e ardhshme

Keshilla Mjekësore

Gazeta Express

19/11/2025 22:45

Një kalkulator online falas, i pari i këtij lloji, mund të parashikojë rrezikun tuaj për sëmundje të zemrës gjatë 30 viteve të ardhshme, thonë ekspertët.

Të dhënat tregojnë se vdekjet e parakohshme nga problemet kardiovaskulare në Britani, përfshirë infarktet dhe goditjet në tru, kanë arritur nivelet më të larta në më shumë se një dekadë.

Ekspertët gjithashtu paralajmërojnë se sëmundjet e zemrës janë shkaku kryesor i vdekjes në mbarë botën, megjithatë rreth 80% e rasteve mund të parandalohet me ndryshime në stilin e jetës.

Si funksionon kalkulatori

Shkencëtarët amerikanë krijuan një mjet falas për të rriturit 30–59 vjeç, i cili llogarit rrezikun 30-vjeçar për sëmundje të zemrës. Atë mund ta kontrolloni duke klikuar këtu:

Kalkulatori përdor përgjigjet tuaja për disa pyetje të thjeshta mbi:

presionin e gjakut

moshën dhe gjininë

diabetin dhe pirjen e duhanit

masën trupore (BMI)

nivelin e kolesterolit

Bazuar në këto të dhëna, përdoruesi merr një vlerësim në përqindile, që e krahasohet me 100 persona të tjerë të të njëjtës moshë dhe gjini.

“Kur një pacient sheh se është në përqindilen e 90-të, kjo mund të jetë një thirrje për t’u zgjuar. Rreziku fillon herët dhe masat parandaluese nuk duhet të shtyhen,” shpjegoi Dr. Sadiya Khan, ekspert i epidemiologjisë kardiovaskulare dhe bashkautori i kalkulatorit nga Northwestern University.

Kalkulatori nuk zëvendëson vizitën tek mjeku, por është një mënyrë për të bërë të qartë përgjegjësinë ndaj zemrës dhe stilit të jetës.

Gjetjet kryesore nga studimi

Meshkujt kanë një rrezik më të lartë afatgjatë se femrat, megjithëse rreziku tek femrat rritet me kalimin e kohës.

Të dhënat u mbledhën nga rreth 8,000 persona pa sëmundje të zemrës, dhe përdorën ekuacionet PREVENT të Shoqatës Amerikane të Zemrës.

Risku i lartë është i lidhur me faktorë të tillë si dieta, pirja e duhanit, presioni i lartë i gjakut dhe kolesteroli i lartë.

Pse është i rëndësishëm tani

Në Britani, vdekjet nga sëmundjet e zemrës janë rritur 18% midis 2019 dhe 2023, nga 18,693 në 21,975.

21% më shumë njerëz diagnostikohen me insuficiencë të zemrës që nga 2020 – shifra më e lartë ndonjëherë.

Lista e pritjes për trajtime planifikuara të zemrës është rritur 83% në Angli deri në mars 2025.

Shkaku i kësaj rritjeje mund të jetë dieta e pashëndetshme, konsumimi i ushqimeve të përpunuara, efektet e Covid-it dhe ndërprerjet në kujdesin primar dhe spitalor.

Si të përdorni kalkulatorin

Mund të provoni kalkulatorin falas këtu  për të parë sa “i vjetër” është zemra juaj dhe për të marrë këshilla për të ulur rrezikun.

“Sa më herët të filloni të përmirësoni shëndetin e zemrës, aq më të mëdha janë shanset për një jetë më të gjatë dhe më të shëndetshme,” përfundon Dr. Khan. /GazetaExpress/