Rusisë i dështon fushata kibernetike, Perëndimi zbardh dhe paralajmëron për sulmet ndaj ndihmës për Ukrainën

Lajme

Gazeta Express

21/05/2025 16:40

Britania dhe aleatët e saj, përfshirë Shtetet e Bashkuara, kanë lëshuar një paralajmërim për një fushatë kibernetike të sponsorizuar nga shteti rus, që synon ndihmën për Ukrainën, kompanitë teknologjike dhe entitete logjistike perëndimore.

Sipas Reuters, Drejtori i Operacioneve në Qendrën Kombëtare për Sigurinë Kibernetike të Britanisë, Paul Chichester, ka deklaruar se “kjo fushatë keqdashëse nga shërbimi i inteligjencës ushtarake të Rusisë paraqet një rrezik serioz për organizatat e synuara, përfshirë ato që ndihmojnë Ukrainën”.

Sipas deklaratës së Chichester, në disa shtete anëtare të NATO-s, fushata ka pasur në shënjestër edhe sektorët e mbrojtjes, shërbimet IT, transportin detar, aeroportet, portet dhe sistemet e menaxhimit të trafikut ajror.

Paralajmërimi i së mërkurës është lëshuar në bashkëpunim me SHBA-në, Francën, Gjermaninë dhe aleatë të tjerë, duke u bërë thirrje organizatave të ndërmarrin masa urgjente për të mbrojtur veten.

“Ne i inkurajojmë fuqishëm organizatat të njihen me kërcënimin dhe këshillat e mbrojtjes të përfshira në këtë njoftim, për të ndihmuar në mbrojtjen e rrjeteve të tyre,” ka thënë Chichester.