Rrihet Bajoku, e humb një rast për t’u kualifikuar në Lojërat Olimpike Tokio 2020

Gazeta Express

15/03/2020 14:39

Boksieri Shpëtim Bajoku ka dështuar të kualifikohet në Lojërat Olimpike Verore Tokio 2020 përmes fazës kualkifikuese në Londër, pasi u mund në luftën e tij të parë të dielën në kryeqytetin britanik.

Pas Besart Pirevës, edhe Bajoku dështoi ta sigurojë biletën në sportin e boksit për Lojërat Olimpike Tokio 2020 përmes Londrës, të cilat pritet të mbahen në qershor, raporton Gazeta Express.

Megjithatë, ata do ta kenë një mundësi të dytë që përmes turneut kualifikues në Paris ta arrijnë qëllimin.

Bajoku u rrah nga boksieri danez Nikolai Terteryan në kategorinë -63 kilogramë. Ekipi i kosovarit e hodhi peshqirin në dysheme në rundin e tretë, për ta dorëzuar meçin.

Ndërkohë, në garë për t’u kualifikuar në Tokio 2020 përmes Londrës kanë mbetur edhe Patriot Behrami, i cili garon nesër në kategorinë -69 kg dhe Donjeta Sadiku, e cila e ka fituar mecin e parë.

Nga faza kualifikuese në Londër, garuesit e sigurojnë biletën për Tokio 2020 nëse arrijnë në gjysmëfinale. Në shumë divizione, kualifikimi arrihet edhe përmes çerekfinales.