Rrahmani gati të kthehet në derbin e madh me Milanin

Futboll

Gazeta Express

23/09/2025 14:25

Amir Rrahmani është gati për t’u rikthyer në fushën e blertë.

Qendërmbrojtësi i Napolit ishte lënduar në ndeshjen e Kosovës me Zvicrën në këtë muaj, ndërsa nga ajo kohë është duke u marrë me rikuperim.

Ai pritej të luante me Pisan mbrëmë, por trajneri Antonio Conte nuk rrezikoi.

E rikthimin e madh përfaqësuesi kosovar mund ta bëjë në këtë fundjavë në derbin e javës me Milanin.

Portali italian “areanapoli” shkruan se 31-vjeçari është shëruar 100 për qind dhe tash është në dorë të trajnerit se kur do të vendosë ta inkuadrojë atë në lojë, përcjell “Gazeta Express”.

Futbollisti kosovar ka ushtruar rregullisht me ekipin në qendrën stërvitore “Castel Volturno”, ndërsa nuk përjashtohet mundësia që të jetë titullar në ndeshjen e së dielës kundër Milanit në San Siro.

Rrahmani është shëruar dhe ndaj Pisas ishte në bankinë, i gatshëm për çdo eventualitet.

Pas tërheqjes muskulore të pësuar me Dardanët, ai mungoi nw dy ndeshje të napolitanëve. /Gazeta Express