Ronaldo mbetet ende pa trofe në Arabinë Saudite, Al Nassr eliminohet nga Liga e Kampionëve e Azisë

Futboll

Gazeta Express

30/04/2025 22:06

Cristiano Ronaldo ka pësuar një tjetër zhgënjim me klubin e tij Al-Nassr, pasi skuadra saudite u eliminua nga Liga e Kampionëve të Azisë. Al-Nassr ishin favoritë të mëdhenj për t’u kualifikuar në finale kundër Al-Ahli këtë të shtunë, por u befasuan nga skuadra japoneze Kawasaki.

Al-Nassr dominoi takimin, por Kawasaki, që renditet në vendin e tetë në elitën japoneze, arriti një fitore të madhe me rezultat 3-2. Sadio Mané shënoi për Al-Nassr, ndërsa Ronaldo humbi një rast të artë në fund të ndeshjes për të barazuar rezultatin. Pavarësisht se ka shënuar me ritëm të lartë që prej transferimit te Al-Nassr në vitin 2023 pas largimit nga Manchester United, kërkimi i Ronaldos për të fituar një trofe madhor në Lindjen e Mesme vazhdon.

Ronaldo do të mbetet në histori si një nga futbollistët më të mëdhenj të të gjitha kohërave dhe në moshën 40-vjeçare, ai mburret me një koleksion të pasur trofesh. Ylli portugez ka fituar pesë herë Ligën e Kampionëve, tre tituj në Premier League, dy tituj kampion në Spanjë dhe Itali, si dhe Euro 2016 me Portugalinë. Ai ka fituar gjithashtu pesë herë Topin e Artë, duke u renditur i dyti pas Lionel Messit.

Megjithatë, golashënuesi historik i Real Madridit nuk ka arritur të fitojë asnjë trofe madhor me Al-Nassr, dhe “mallkimi” i tij vazhdoi edhe ndaj Kawasakit.

Pavarësisht se ka shënuar 91 gola në 101 ndeshje me Al-Nassr, Ronaldo nuk ka arritur të fitojë Ligën e Arabisë Saudite, Ligën e Kampionëve të Azisë, apo ndonjë trofe vendor.