Rinumërohet edhe qarku i Fierit, dy anëtarët e PD në KAS mbështesin kërkesën e Adriatik Lapajt

Shqiperi

Gazeta Express

09/06/2025 15:30

Pas Tiranës, edhe votat e qarku të Fierit do të rinumërohen të gjitha për partitë dhe kandidatët.

Kërkesa u bë nga partia e Adriatik Lapajt pasi PD kërkoi vetëm hapjen e disa qendrave të votimit.

Edhe pse Komisioni i Ankimimeve dhe Sanksioneve e rrëzoi kërkesën e Lapajt, PD i erdhi në ndihmë dhe 2 anëtarët e propozuar nga ajo në KAS vendosën që i gjithë Fieri të rinumërohet.

“Me kërkesë të dy anëtarëve të KAS, i kërkohet administratës që të këqyrë të gjitha kutitë e votimit të qarkut Fier, për subjektet zgjedhore dhe kandidatët për votat brenda vendit si në rastin e qarkut Tiranë. Kështu që merrni masat, me mbarimin e qarkut Tiranë, të vazhdojë me këqyrjen e kutive të votimit të qarkut Fier”, tha Elvin Lako (Komisioni i Ankimimeve dhe Sanksioneve).

“Shqipëria Bëhet” dhe Adriatik Lapaj e humbi mandatin në Fier për 519 vota, mandat të cilin e mori PS dhe mbetet për tu parë nëse rinumërimi sjell ndonjë ndryshim në rezultat.

Ndërsa PD nuk ka pretendime për rezultatin në Fier por beson se hapja e kutive i shërben transparencës së procesit të 11 majit.

Deri tani është vendosur të rinumërohet i plotë qarku i Tiranës dhe i Fierit, në Dibër do të numërohen vetëm votat e kandidatëve të PD, ndërkohë që pritet vendimi i KAS për Durrësin qark në të cilin PD ka kërkuar gjithashtu rinumërim.