Reuters: SHBA përdori “pothuajse të gjitha” raketat e saj precize me rreze të gjatë gjatë luftës me Iranin

Gazeta Express

04/08/2026 17:56

Ushtria e SHBA-së ka përdorur pjesën më të madhe të rezervës së saj të raketave shumë precize me rreze të gjatë gjatë luftës pesëmujore me Iranin, sipas tre personave të njohur me të dhënat, duke ngritur shqetësime për gatishmërinë e ushtrisë për konflikte të ardhshme, raporton agjencia ndërkombëtare e lajmeve, Reuters.

Këto raketa janë kryesisht armët tokë-tokë të Ushtrisë, të njohura si Army Tactical Missile Systems (ATACMC) dhe Precision Strike Missiles (PrSM). SHBA-ja i ka përdorur “pothuajse të gjitha” këto armë, sipas dy prej burimeve.

Shkalla në të cilën ushtria po i shteron rezervat e raketave ATACMS dhe Precision Strike Missiles nuk është raportuar më parë.

Këto municione me rreze të gjatë – që kushtojnë më shumë se 1 milion dollarë secila – janë një pjesë e rëndësishme e arsenalit ushtarak, pasi mundësojnë goditje të sakta nga një distancë e sigurt. Raketat ATACMS të furnizuara nga SHBA-ja kanë luajtur një rol kyç në luftën në Ukrainë, duke u mundësuar forcave ukrainase të godasin objektiva brenda Rusisë. PrSM është një gjeneratë më e re dhe më e avancuar, e cila do të zëvendësojë ATACMS, që ka një rreze më të shkurtër veprimi.

Pakësimi i ndjeshëm i rezervave të raketave precize me rreze të gjatë nënkupton se presidenti amerikan Donald Trump mund të detyrohet të mbështetet më shumë në misione bombardimi me pilotë, të cilat janë më të rrezikshme, nëse ai rifillon sulme në shkallë të gjerë ndaj Iranit.

Burimet nuk pranuan të tregojnë se sa raketa të secilit lloj i kanë mbetur SHBA-së.

Trump e nisi luftën me Iranin së bashku me Izraelin në shkurt, duke parashikuar se konflikti do të zgjaste pak kohë.

Por ndërsa lufta po zgjatet, tre personat e njohur me çështjen shprehën shqetësimin se rënia e rezervave të raketave mund të kufizojë aftësinë e SHBA-së për të penguar kundërshtarët, përfshirë Rusinë dhe Kinën.

Një person i katërt, gjithashtu i njohur me çështjen, tha se Komanda Qendrore (CENTCOM) – e cila mbikëqyr forcat amerikane në Lindjen e Mesme – pothuajse i ka shteruar raketat tokësore që kishte përpara fillimit të luftës, por ka arritur t’i rimbushë rezervat nga furnizimet ushtarake amerikane në pjesë të tjera të botës.

Burimet e intervistuara për këtë artikull folën në kushte anonimiteti.

I pyetur për të komentuar mbi të dhënat e rezervave, Shtëpia e Bardhë publikoi një deklaratë të Trumpit, ku thuhej se SHBA-ja kishte “shumë më tepër municione se kushdo tjetër në botë” dhe “shumë më tepër sesa na duhen”.

“Kompanitë tona të mbrojtjes, në këtë moment, po prodhojnë më shumë municione se kurrë më parë, ndërsa po zgjerojnë fabrikat dhe pajisjet e tyre në nivele rekord”, tha Trump.

Analistët pajtohen se disa lloje municionesh, përfshirë predhat e artilerisë dhe disa lloje raketash, po prodhohen në nivele rekord, por paralajmërojnë se rezervat mund të mos mjaftojnë për një luftë të zgjatur.

Lockheed Martin, që prodhon raketat ATACMS dhe PrSM, si edhe sistemin kundër-raketor THAAD, nuk iu përgjigj menjëherë pyetjeve lidhur me deklaratat e Trumpit apo me nivelin e rezervave. As Raytheon, që prodhon raketat Tomahawk dhe raketat për sistemin Patriot, dy armë të rëndësishme amerikane, nuk u përgjigj menjëherë.

Duke iu përgjigjur një kërkese për koment, zëdhënësi kryesor i Pentagonit, Sean Parnell, tha: “Ushtria amerikane është më e fuqishmja në botë dhe ka gjithçka që i nevojitet për të vepruar në kohën dhe vendin që zgjedh Presidenti. Ne kemi kryer me sukses disa operacione në komanda të ndryshme luftarake, duke siguruar njëkohësisht që ushtria amerikane të ruajë një arsenal të thellë aftësish për të mbrojtur popullin dhe interesat tona”.

Shifrat mbi rezervat kanë qarkulluar brenda qeverisë federale gjatë javës së kaluar, në kuadër të bisedimeve të tensionuara brenda administratës Trump për sa kohë SHBA-ja mund të vazhdojë sulmet ndaj Iranit pa i ulur rezervat në nivele që do ta kufizonin aftësinë e ushtrisë për t’iu përgjigjur krizave në pjesë të tjera të botës.