Regjistrimet në Universitetin e Tiranës në 7 faza nga 29 gushti deri më 11 shtator

Shqiperi

Gazeta Express

29/08/2025 13:03

Në Universitetin e Tiranës kanë nisur sot regjistrimet për vitin akademik 2025–2026 duke mirëpritur maturantët fitues për t’u bërë pjesë e familjes akademike.

Raundi i parë i regjistrimeve zhvillohet nga data 29 gusht deri më 11 shtator 2025, i ndarë në 7 faza 48-orëshe: Faza I: 29–30 gusht;  Faza II: 31 gusht – 1 shtator; Faza III: 2–3 shtator; Faza IV: 4–5 shtator; Faza V: 6–7 shtator; Faza VI: 8–9 shtator dhe Faza VII: 10–11 shtator.

Kandidatët e shpallur fitues duhet të paraqiten pranë sekretarisë së fakultetit përkatës, për të dorëzuar dokumentacionin e nevojshëm për procesin e regjistrimit.

UT sqaron se pas çdo faze, nëse mbeten kuota të paplotësuara, zhvendoset vija e kuqe në listë dhe shpallen fitues të rinj, të cilët regjistrohen vetëm në fazën pasardhëse.

Për t’u regjistruar në profilin e studimit që kanë zgjedhur, studentët duhet të paraqiten me dokumentacionin e mëposhtëm pranë sekretarive mësimore të fakultetit.

Dokumentet: Kopje e dokumentit të identifikimit; )Diploma e maturës shtetërore së bashku me certifikatën përkatëse të notave e shkarkuar me vulë elektronike nga E-Albania, ose të një diplome studimi të fituar jashtë vendit dhe të njehsuar nga QSHA; Deklaratën e paraqitur në shtojcën nr. 1 pjesë përbërëse e udhëzimit e cila plotësohet nga kandidati në prani të punonjësit të sekretarisë mësimore të IAL-së dhe që nënshkruhet prej tyre;

Formulari i aplikimit sipas shtojcës nr. 2, pjesë përbërëse e udhëzimit dhe pagesa e tarifës së regjistrimit (1600 lekë).

Me 164 programe studimi dhe një staf akademik të kualifikuar, Universiteti i Tiranës garanton formimin profesional dhe shkencor të studentëve, duke i përgatitur ata për tregun e punës dhe për të ardhmen e tyre.