Reçica për vendimin e Qeverisë për shtesat e lehonave: Kujdes social apo kalkulim elektoral

Lajme

Gazeta Express

06/06/2025 7:18

Pas vendimit të Qeverisë në detyrë për rritjen e shtesave për lehonat, për FrontOnline ka folur ish-ministri i Punës dhe Mirëqenies Sociale, Skender Reçica duke e cilësuar mbështetjen si të nevojshme, por të vonuar dhe me motive të dyshimta politike.

“Çdo mbështetje shtesë për qytetarët, qoftë për shërbyesit civilë apo për lehonat është e mirëpritur,” deklaroi Reçica. Ai theksoi rëndësinë e ndihmës në kohë të vështira ekonomike, duke shtuar se “në një kohë me kosto të lartë jetese dhe pasiguri ekonomike, çdo ndihmë konkrete në buxhetin familjar është e nevojshme.” tha ai.

Megjithatë, sipas tij, masat e tilla nuk duhet të jenë të përkohshme dhe të lidhura me ciklet zgjedhore.

“Qytetarët kanë nevojë për politika të përgjegjshme dhe afatgjata, jo masa të fragmentuara që zbatohen vetëm kur afron koha e zgjedhjeve,” theksoi ai.

Reçica ngriti pikëpyetje serioze mbi momentin kur është marrë vendimi.

“Fatkeqësisht, vendimi për rritjen e pagave dhe shtesave për lehonat, ndonëse në thelb i drejtë, vjen në një moment që ngjall dyshime të arsyeshme: pikërisht në prag të shpalljes së datës për zgjedhjet lokale, apo ndoshta edhe atyre parlamentare, për shkak të moskonstituimit të Kuvendit,” u shpreh ai.

Ai kërkoi rregullim të përhershëm ligjor për çështje të tilla, sidomos për shërbyesit civilë dhe nënat.

“Pagat e shërbyesve civil duhet të rriten në përputhje me inflacionin dhe të garantohen me ligj, në mënyrë që të mos përdoren si instrument manipulimi në periudha elektorale,” deklaroi Reçica, duke shtuar se “është urgjente të miratohet një ligj i posaçëm dhe gjithëpërfshirës për lehoninë, që garanton të drejtat elementare pa u ndikuar nga ciklet zgjedhore.”

Ai e cilësoi të papranueshme përdorimin e masave sociale për përfitime politike.

“Zgjidhjet e përkohshme nuk janë të mjaftueshme. Politikat duhet të jenë të qëndrueshme, transparente dhe të ndërtuara mbi nevojat reale të qytetarëve, për çdo ditë dhe jo vetëm në prag të fushatave elektorale,” tha ai, duke shtuar se “këto veprime kërkojnë analizë serioze dhe llogaridhënie. Pyetjet janë të qarta dhe legjitime: pse nuk u veprua më herët? Pse mungoi transparenca? Dhe pse gjithmonë ndodh në prag të zgjedhjeve?” përfundoi Reçica.