Reali ia vendosë çmimin Viniciusit

Sport

Gazeta Express

12/07/2025 8:00

E ardhmja e Vinícius Jr. te Real Madridi nuk është më një temë tabu.

Pas një paraqitjeje zhgënjyese në Kupën e Botës për Klube dhe një sezoni të karakterizuar nga mungesa e vazhdimësisë, klubi i bardhë ka marrë një vendim të qartë: nëse vjen një ofertë prej 150 milionë eurosh, braziliani do të shitet. Skenari ka ndryshuar, dhe në hierarkinë e Bernabéut, ai nuk shihet më si një pjesë thelbësore e projektit.

Ajo që një vit më parë dukej e paimagjinueshme, tani diskutohet lirshëm mes drejtuesve. Performanca e anësorit ka rënë ndjeshëm dhe lidhja e tij me figura kyçe si Kylian Mbappé nuk është realizuar siç pritej. Eksperimenti ofensiv që duhej të shkëlqente ka sjellë më shumë dyshime se sa siguri. Vinícius, larg shpërthimit të talentit të tij, ka treguar një version të zbehtë e të parashikueshëm, pa freskinë që e veçonte më parë.

Kjo situatë ka përkeqësuar marrëdhëniet e tij me një pjesë të tifozëve dhe drejtuesve. Kritikat vazhdojnë dhe dyshimet shtohen me çdo ndeshje. Në këtë kontekst, nuk përjashtohet që në tavolinë të vijë një ofertë milionëshe nga Arabia Saudite. Interesi nga ai rajon për brazilianin është real dhe, për një shumë afër 150 milionëve, Florentino Pérez nuk do ta ndalojë largimin e tij.

Ndërkohë, Xabi Alonso është në kërkim të zgjidhjeve. Dysheja Mbappé-Gonzalo García po fiton terren në stërvitje, duke e lënë ish-lojtarin e Flamengos në një rol dytësor. Trajneri bask e ka bërë të qartë se meritokracia mbizotëron, dhe Vinícius nuk po përmbush pritshmëritë.

Në këtë skenar të ri, anësori do të duhet të luftojë me hijen e vet. Real Madridi tashmë e ka përcaktuar qëndrimin: nëse nuk reagojnë, largimi i tij jo vetëm që është i mundshëm, por edhe i dëshirueshëm.