Reali i vendosur për Fàbregasin për ta zëvendësuar Arbeloan

Sport

Gazeta Express

10/03/2026 12:15

Një emër surprizë ka dalë në skenë për bankinën e Real Madridit.

Sipas raportimeve nga mediat spanjolle, drejtuesit e klubit madrilen po e shqyrtojnë mundësinë që trajneri aktual i Comos, Cesc Fàbregas, ta marrë drejtimin e skuadrës në të ardhmen, përcjell “Gazeta Express”.

Ish-mesfushori i Barcelonës, Arsenalit e Chelseat po bën punë mjaft të mirë në fillimet e tij si trajner me Comon dhe drejtuesit e Realit besohet se e vlerësojnë shumë karizmën, njohuritë taktike dhe aftësinë e tij për ta udhëhequr një skuadër të madhe.

Sipas raportimeve, klubi madrilen e ka ndjekur prej kohësh zhvillimin e tij si trajner dhe beson se spanjolli mund të ketë potencial për ta drejtuar Real Madridin në një moment të caktuar të karrierës.

Fàbregas ka pasur gjithashtu marrëdhënie të mira me Real Madridin gjatë periudhës së tij te Como, pasi i ka realizuar disa transferime nga akademia e klubit madrilen dhe madje e ka vizituar qendrën stërvitore në Valdebebas për të diskutuar për lojtarë të rinj.

Aktualisht stolin e “Los Blancos” e mban ish-mbrojtësi i klubit, Álvaro Arbeloa, i cili e mori drejtimin e ekipit pas largimit të parakohshëm të Xabi Alonsos. /Gazeta Express