Reali e City synojnë ta nisin me këmbë të hairit të tetën e finales së Championsit

Futboll

Gazeta Express

13/02/2024 12:20

Liga e Kampionëve do të rikthehet sonte me fazën e së tetës së finales.

Kampioni aktual evropian, Manchester City dhe klubi më i suksesshëm evropian, Real Madrid, do të zbresin në fushën e blertë për t’i zhvilluar duelet e para përkatëse.

Në letër, si klubi anglez, ashtu edhe ai spanjoll, janë favoritë ndaj Copenhagen respektivisht Red Bull Leipzigut.

“Citizens” do ta vizitojnë sonte Danimarkën, ku i pret Copenhagen, e cila e mbylli si e dyta Gripin A, prapa Bayern Munichut, duke i lënë jashtë garës Manchester Unitedin dhe Galatasarayn, shkruan “Gazeta Express”.

Derisa në Danimarkë pjesa e dytë e sezonit nuk ka nisur ende, gjiganti i këtij shteti megjithatë është bërë gati për kampionin aktual anglez.

Natyrisht, pasi e ka ritmin e lojës, City e ka një përparësi edhe në këtë aspekt.

Këto dy skuadra ishin përballur mes vete dy herë në edicionin e kaluar pasi ishin në të njëjtin grup të Championsit, me “Qytetarët” që fituan një herë dhe një duel përfundoi baras.

Duhet cekur se City e mbylli fazën e grupeve me të gjitha ndeshjet e fituara.

E njëjta gjë vlen edhe për kampionin e 14 fishtë evropian, Real Madrid.

“Los Blancos” do të kenë punë me Leipzigun në udhëtim.

Ekipi i Carlo Ancelottit, i cili u shkëput në krye të La Ligas pas fitores 4:0 ndaj Gironës, do të mundohet të krijojë avantazh qysh në lojën e parë në Gjermani, shkruan “Gazeta Express”.

Madrilenëve do t’ju mungojë Jude Bellingham pasi ylli anglez u lëndua në fundjavë.

Leipzigu ishte në grup me Cityn dhe në të tetën e finales shkoi si i dyti.

Natyrisht, gjermanët janë të vetëdijshëm me fuqinë e madrilenëve në Evropë, por do të mundohen ta bëjnë mrekullinë në këtë fazë.

Ndeshjet e sontme do të fillojnë në orën 21:00. /Gazeta Express/