Rashfordi mund të mos luajë për Barcelonën në La Liga

Sport

Gazeta Express

04/08/2025 20:55

Marcus Rashford mund të mos arrijë të luajë për Barcelonën në La Liga përpara fillimit të sezonit të ri për shkak të problemeve me regjistrimin e tij.

Sulmuesi anglez iu bashkua Barcelonës nga Manchester United në formë huazimi njëvjeçar dhe shënoi golin e tij të parë për klubin e ri në fitoren 5-0 ndaj skuadrës koreano-jugore Daegu, ku edhe festoi me entuziazëm. Barça ka edhe një miqësore të fundit përpara hapjes së kampionatit kundër Real Mallorca më 16 gusht.

Megjithatë, Rashford rrezikon të mos përfaqësojë katalanasit nëse klubi nuk arrin ta regjistrojë atë për La Liga. Për më shumë se tre vite, Barcelona është përballur me probleme financiare që kanë vështirësuar regjistrimin e lojtarëve të rinj. Shembulli i fundit ishte Dani Olmo, i cili u rikthye verën e vitit 2024, por u regjistrua vetëm pasi klubi gjeti një hapësirë ligjore për ta bërë të mundur.

Presidenti Joan Laporta trashëgoi një klub të zhytur në borxhe kur u rikthye në krye, ndërsa edhe Lionel Messi u detyrua të largohej nga Camp Nou pasi kontrata e tij e re nuk mund të regjistrohej. Për të përmbushur rregulloret e ligës, Barça ka përdorur “leva financiare” për të regjistruar afrimet e reja.

Rashford ishte i vendosur të transferohej në Barcelonë pasi Manchester United e nxori në tregun e transferimeve. Por tani, 27-vjeçari mund të shohë ëndrrën e tij të prishet nëse klubi nuk e regjistron dot për garat e La Liga-s. Në këtë rast, ai do të mund të stërvitet me ekipin e parë dhe të luajë vetëm në ndeshje jozyrtare, por jo në kampionat.

Megjithatë, Rashford është optimist se Barcelona do ta zgjidhë këtë çështje. “Është diçka që klubi duhet ta zgjidhë,” tha ai për gazetarët. “Unë besoj se do ta zgjidhin. Unë thjesht fokusohem te stërvitja dhe të jem gati për fillimin e sezonit.”

Laporta gjithashtu ka shprehur besim se klubi do të arrijë të regjistrojë Rashfordin dhe lojtarë të tjerë si Joan García, Roony Bardghji, Wojciech Szczesny dhe Gerard Martín. “Gjërat po ecin mirë,” tha presidenti. “Po bëjmë punën tonë dhe jemi të bindur se do të arrijmë t’i regjistrojmë të gjithë./GazetaExpress/