Raportohet se vëllai i Faruk Mujkës është në mesin e 21 të arrestuarve në aksionin kundër bixhozit të paligjshëm

Lajme

Gazeta Express

19/04/2026 13:18

Fahredin Mujka, vëllai i Faruk Mujka, është në mesin e 21 personave të arrestuar në kuadër të një operacioni të madh kundër bixhozit të paligjshëm dhe skemave piramidale.

Aksioni është zhvilluar në disa qytete, përfshirë Mitrovicën, Vushtrrinë, Prishtinën dhe Istogun, në koordinim mes Policisë së Kosovës dhe Prokurorisë Themelore në Mitrovicë.

Sipas informacioneve, Fahredin Mujka (55 vjeç) dyshohet për përfshirje në organizimin e aktiviteteve ilegale të lojërave të fatit.

Gjatë bastisjeve në dhjetëra lokacione janë sekuestruar rreth 170 mijë euro para të gatshme, vetura, telefona dhe dy armë zjarri, ndërsa disa nga të dyshuarit janë kapur në flagrancë.

Por as vet Faruk Mujka nuk është i pastër nga akuzat, pasi ai përballet me disa procedura penale, përfshirë keqpërdorim të pozitës zyrtare, mosraportim të pasurisë dhe dyshime për raste financiare që lidhen me periudhën e tij në detyrë publike./Sinjali