Raportohet se hetuesi i suspenduar pas vrasjes në Gjilan është vëllai i kandidatit për deputet nga VV-ja

Lajme

Gazeta Express

12/08/2025 10:44

Katër zyrtarë policorë u suspenduan ditën e djeshme lidhur me veprimet e tyre për vrasjen e trefishtë në Gjilan.

Në mesin e të suspenduarve, është edhe Ardian Demiri, hetues në Gjilan.

Bazuar në postimet të cilat janë publike nëpër rrjete sociale, Nacionale raporton se Ardian Demiri është vëllai i Burim Demirit, ish-kandidat për deputet nga Lëvizja Vetëvendosje në Gjilan.

Demiri kishte qenë këshilltar i Jashtëm për Kulturë i kryetarit të Gjilan.

Në vitin 2022, Burim Demiri ishte bërë pjesë e Listës Guxo.

Njoftimi nga Inspektorati Policor i Kosovës:

Inspektorati Policor i Kosovës ka filluar një hetim paraprak në kuadër të të cilit do të hetohet nëse ka pasur ndonjë lëshim apo përfshirjeje të mundshme të ndonjë pjesëtari të Policisë së Kosovës në veprimtarinë kriminale të të dyshuarit i shpallur në kërkim për vrasjen e trefishtë në Gjilan.

Bazuar në autorizimet ligjore dhe në rëndësinë e ruajtjes së integritetit të hetimit dhe shmangien e çdo ndikimi mbi dëshmitarë apo prova, Inspektorati Policor i Kosovës i ka rekomanduar sot Policisë së Kosovës suspendimin për katër zyrtarë policorë të Drejtorisë Rajonale të Policisë në Gjilan.

Bazuar në rekomandimin e IPK-së janë suspenduar një rreshter policor dhe një hetues nga njësiti i hetimeve rajonale të Drejtorisë rajonale në Gjilan, një rreshter policor – shef i hetimeve në Stacionin Policor të Novobërdës dhe një zyrtar policor i angazhuar në Njësinë e Reagimit të Shpejtë, Drejtoria Rajonale e Policisë Gjilan.