Raporti bel–gjatësi është më i saktë se BMI për parashikimin e shëndetit, sugjeron studimi i ri

Keshilla Mjekësore

Gazeta Express

05/01/2026 22:37

Matja e raportit mes belit dhe gjatësisë është një tregues “shumë më i mirë” i shëndetit sesa indeksi i masës trupore (BMI), sipas kërkimeve të reja.

Përdorimi i një metri rrobash mund të ndihmojë në identifikimin e personave që kanë më shumë yndyrë të grumbulluar rreth organeve jetike – një faktor që rrit rrezikun për sëmundje si ato të zemrës dhe goditjet në tru.

Sipas ekspertëve, nëse perimetri i belit është më i vogël se gjysma e gjatësisë së trupit, kjo është një shenjë e mirë se personi ka peshë të shëndetshme, veçanërisht te të moshuarit.

BMI-ja llogaritet duke pjesëtuar peshën (në kilogramë) me katrorin e gjatësisë (në metra), ndërsa raporti bel–gjatësi llogaritet duke pjesëtuar perimetrin e belit me gjatësinë. Problemi kryesor i BMI-së është se nuk bën dallim mes peshës nga yndyra dhe peshës nga muskujt.

Një BMI mbi 30 klasifikohet si obezitet. Në vitet 2023–2024, rreth 64.5 për qind e të rriturve në Angli vlerësoheshin si mbipeshë ose obezë, ndërsa 26.5 për qind jetonin me obezitet.

Dr. Laura Gray nga Universiteti i Sheffield-it shpjegon:

“Shpesh dëgjojmë se atletët kanë BMI mbi 30 dhe, sipas këtij kriteri, do të klasifikoheshin si obezë – por ne e dimë se nuk janë. Ata nuk kanë peshë të tepërt. Ky studim tregon anën tjetër të medaljes.

Të moshuarit priren të humbasin masë muskulore me kalimin e moshës; kjo do të thotë se përqindja e yndyrës trupore rritet, ndërsa pesha totale bie. Si pasojë, BMI-ja ulet, por shëndeti në fakt përkeqësohet. Raporti bel–gjatësi, sepse mat perimetrin e belit, na jep një pasqyrë më të saktë të yndyrës viscerale.”

Yndyra viscerale – ajo që depozitohet rreth organeve jetike – ka ndikim më të madh në funksionimin e trupit, shton Dr. Gray.

Duke mbështetur përdorimin e raportit bel–gjatësi, ajo thekson edhe anën praktike:

“Një metër matës është më i lirë se një peshore. Është edhe më i thjeshtë për t’u përdorur, sepse kemi të bëjmë vetëm me një raport, jo me llogaritje më të ndërlikuara si te BMI-ja.”

Studimi, i publikuar në International Journal of Obesity dhe i udhëhequr nga studiues të universiteteve të Sheffield-it dhe Nottingham-it, analizoi të dhëna nga Health Survey for England për periudhën 2005–2021.

Studiuesit arritën gjithashtu në përfundimin se mjedisi ka një ndikim “të konsiderueshëm” në obezitet, duke theksuar se faktorët përreth nesh luajnë rol po aq të rëndësishëm sa edhe zakonet individuale. /GazetaExpress/