Ramiz Lladrovci thotë se e ka takuar sot Bedri Hamzën: Kemi biseduar rreth tre orë

Lajme

Gazeta Express

19/11/2025 22:36

E fitoi komunën e Drenasit me Iniciativën për Drenasin Kampion, por, edhe pse e pati kundërshtare PDK-në në zgjedhjet lokale, Ramiz Lladrovci po thotë se kjo komunë është e PDK-së.

Në Rubikon të Klan Kosovës, Lladrovci tha se është takuar me kryetarin e ri të PDK-së, Bedri Hamzën gjatë ditës së sotme.

Por thotë se nuk është marrë vesh për asgjë, sepse, sipas tij, nuk mund të realizohen disa gjëra në takimin e parë.

“Sot jam takuar me Bedri Hamzën, rreth 3 orë kemi biseduar për të ardhmen e PDK-së, për proceset, procedurat, zhvillimet në PDK. Edhe me dasht nuk munesh me u marr vesh në takimin e parë, sepse ai duhet me bisedu edhe palën tjetër. Ne s’kemi nevojë me lëndu njanën palë, me kthy tjetrën palë e me lëndu njanën palë, sepse ne duhet me provu me dalë unikë”, deklaroi Lladrovci.

Kryetari i Drenasit tha se nëse PDK-ja bëhet bashkë me të për zgjedhjet e ardhshme qendrore, do t’i fitojnë ato.

“Nëse merremi vesh, dalim unikë, ne besoj shkojmë drejt fitores së zgjedhjeve që po vijnë. Me neve bashkë, krejt… si të jemi unikë, i fitojmë (zgjedhjet). Unë jam duke thënë Iniciativa, apo komuna e Drenasit që e udhëheqi unë, është komunë e PDK-së. Tash në KQZ shkruan iniciativa. Nëse shkojmë në zgjedhje bashkë, është sukses shumë i madh. Por edhe nëse nuk shkojmë, unë nuk hezitoj të shkoj edhe me iniciativë”, deklaroi Lladrovci.