Ramadani shkel masat e MSH-së, pi kafe ulur në restorant bashkë me dy zyrtarë të tjerë - Gazeta Express

Lajme

Gazeta Express

29/05/2020 11:12

Ramadani shkel masat e MSH-së, pi kafe ulur në restorant bashkë me dy zyrtarë të tjerë

Lajme

Gazeta Express

29/05/2020 11:12

Drejtori i Institutit Kombëtar të Shëndetit Publik, Prof. Naser Ramadani, është parë duke pirë kafe në një restorant në hapësirën e oborrit të Qendrës Klinike Universitare, duke shkelur masat e MSH-së dhe rekomandimet e institucionit të cilin e udhëheq vetë ai.

Gazeta ka siguruar disa fotografi dhe video ku Ramadani shihet ulur në restorant pa maskë gjatë ditës së djeshme së bashku me zyrtarin tjetër të IKSHPK-së, Naim Jerliu dhe një person tjetër. Përveç tyre në të njëjtën kohë në restorantin “Beni” i cili është shumë afër ndërtesës së Institutit, janë parë ulur duke pirë kafe në tarracë edhe plot qytetarë të tjerë.

Ky veprim i drejtorit të Institutit Kombëtar dhe dy zyrtarëve tjerë është në kundërshtim me rekomandimet që kanë dalë deri tani nga IKSHPK-ja, si dhe masat kufizuese të Ministrisë së Shëndetësisë për bizneset e gastronomisë.

Ministria e Shëndetësisë pati mbyllur restorantet dhe kafenetë në Kosovë pas shfaqjes së rastit të parë pozitiv me Covid-19 më datën 13 mars. Ky vendim, sikurse të gjitha kufizimet tjera të vendosura nga MSH-ja, janë marrë me rekomandim të Institutit Kombëtar.

MSH-ja ka lejuar bizneset e gastronomisë që të shërbejnë klientët e tyre në formë ‘merre me vete’ që nga data 18 maj dhe ky vendim ende nuk ka ndryshuar. Por këtë nuk e ka respektuar vetë drejtori i Institutit, Prof. Ramadani, duke u ulur në restorant së bashku me persona të tjerë.

Kujtojmë se Instituti Kombëtar i Shëndetit Publik i cili udhëhiqet nga Ramadani, ka bërë thirrje vazhdimisht qytetarëve që të respektojnë rekomandimet e tyre për të mbajtur distancën, mbajtjen e maskave, si dhe respektimin e masave të Ministrisë së Shëndetësisë.

“Qytetarë, kthjelluni, ejani në vete, vëni gishtin në kokë, virusi nuk tallet”, ishin disa nga thirrjet e IKSHPK-së për qytetarët që nuk respektonin masat dhe rekomandimet për mbrojtje nga koronavirusi.