Qipro forcon bazat ushtarake me SHBA dhe BE për evakuime humanitare në Lindjen e Mesme

Lajme

Gazeta Express

20/04/2026 11:52

Qipro do të modernizojë dy baza kyçe ushtarake me fonde nga SHBA dhe BE, për të rritur kapacitetin e saj si qendër humanitare për evakuime nga konfliktet në Lindjen e Mesme.

Baza ajrore “Andreas Papandreou” në Pafos do të zgjerohet për të akomoduar avionë të rëndë transportues dhe për të përshpejtuar furnizimet dhe operacionet e evakuimit. Ndërsa baza detare “Evangelos Florakis” në Mari do të pajiset me një heliport të ri për helikopterë të mëdhenj si Chinook, që do të përdoren për transportimin e civilëve nga zonat e krizës.

SHBA ka dhënë fillimisht rreth 500 mijë euro për planifikim, ndërsa kostoja totale e projekteve mund të arrijë deri në 14 milionë euro për bazën ajrore dhe mbi 200 milionë euro për bazën detare, me mbështetje të mundshme shtesë nga BE, shkruan Euronews.

Qipro ka luajtur rol të ngjashëm edhe më parë në evakuime nga Libani, Sudani dhe Gaza, duke u shndërruar në një nyje të rëndësishme humanitare në Mesdheun Lindor. Sipas autoriteteve, këto baza do të përdoren vetëm për operacione humanitare, jo për veprime ushtarake sulmuese.