Qeveria po shqyrton fluturime çarter për evakuimin e qytetarëve të RMV-së nga zonat e konfliktit, 473 kanë kërkuar kontaktuar përfaqësitë konsullore

Maqedoni

Gazeta Express

03/03/2026 15:00

Ministria e Punëve të Jashtme dhe Tregtisë së Jashtme informon se po punon intensivisht për të siguruar kushtet për evakuimin e duhur dhe të sigurt të qytetarëve maqedonas nga zonat e prekura, përfshirë edhe nga Emiratet e Bashkuara Arabe. 

Aktualisht po zhvillohen plane për kthimin e qytetarëve të Maqedonisë nga Izraeli nëpërmjet Egjiptit, duke përdorur fluturime komerciale dhe, nëse është e nevojshme, siç thuhet, aeroplan qeveritar. Për Emiratet e Bashkuara Arabe dhe Katarin, po shqyrtohet mundësia e angazhimit të një fluturimi komercial ose çarter, varësisht nga kushtet e sigurisë dhe logjistike, transmeton Portalb.mk.

“Në periudhën e kaluar, është ofruar ndihmë nëpërmjet misioneve diplomatike dhe konsullore në evakuimin e sigurt të një personi nga Irani – një futbollisti, i cili u kthye në Republikën e Maqedonisë së Veriut nëpërmjet Turqisë. Përveç kësaj, gjashtë qytetarë të Maqedonisë nga Izraeli tashmë kanë siguruar bileta avioni nga Egjipti për në Shkup, me Ministrinë që ndihmon në mënyrë aktive në koordinimin dhe largimin e tyre. Siguria e qytetarëve të Maqedonisë mbetet përparësia më e lartë. Ministria, në komunikim të drejtpërdrejtë me vendet mike dhe partnerët, si dhe nëpërmjet misioneve diplomatike dhe konsullore, po ndërmerr të gjitha aktivitetet e nevojshme për kthimin e tyre të sigurt dhe në kohë në vend”, thonë nga MPJTJ.

MPJ ka publikuar edhe numrat e ambasadave ku do të mund të kërkohet ndihmë: Ambasada në Doha (+974 50 173 111), Abu Dabi (+971 56 441 7532), Tel Aviv (+972 54 500 8566 & +972 54 967 0546), ndërsa SOS numri i kujdestarisë në Ministri është 075 273 732.