PSG më shumë ndryshime në ndeshjen kundër skuadrës së fundit në Ligue 1

Futboll

Gazeta Express

10/05/2025 20:21

Dy skuadra në skajet e kundërta të tabelës, të ndara nga plot 62 pikë, përballen në këtë ndeshje teksa Montpellieri i rënë nga kategoria pret kampionët e Francës, Paris Saint-Germain.

Vendasit hyjnë në këtë ndeshje pa asnjë fitore në 13 ndeshjet e fundit të ligës (1 barazim, 12 humbje) dhe me vetëm dy gola të shënuar gjatë kësaj serie pa fitore – formë aspak e dëshirueshme për trajnerin Zoumana Camara që u bashkua me ekipin muajin e kaluar.

Camara nuk ka pasur vetëm probleme në fazën ofensive për të zgjidhur, por është përballur edhe me një mbrojtje të dobët që ka arritur të mbajë vetëm një portë të paprekur gjatë gjithë sezonit – ndonëse ajo erdhi në ndeshjen e fundit në shtëpi (0-0 kundër Reimsit).

Por është pak e besueshme që do ta mbajnë një tjetër portë të paprekur ndaj PSG-së, duke pasur parasysh që Montpellier ka pësuar plot 41 gola në 10 ndeshjet e fundit në Ligue 1 kundër parisienëve!

Kampionët e Francës vijnë në këtë ndeshje me moral të lartë pasi siguruan kualifikimin në finalen e UEFA Champions League në mesjavë, duke eliminuar Arsenalin me rezultat të përgjithshëm 3-1.

Trajneri Luis Enrique mund të bëjë disa ndryshime në formacion për këtë përballje, duke pasur parasysh finalen që i pret në fund të majit, por kjo mund të mos jetë problem për PSG-në, që i ka fituar 11 përballjet e fundit në Ligue 1 ndaj Montpellier-it.

Megjithatë, ka shenja se PSG-ja ka ulur ritmin pasi siguroi titullin, duke mos fituar asnjërën nga tri ndeshjet e fundit në kampionat (1 barazim, 2 humbje). Humbja 2-1 ndaj Strasbourg-ut javën e kaluar i dha fund serisë më të gjatë të pamposhtur në transfertë në historinë e pesë ligave kryesore të Europës (39 ndeshje), por PSG nuk ka humbur dy ndeshje radhazi si mysafir në Ligue 1 që nga janari 2023.

Lojtarët për t’u ndjekur: Téji Savanier shënoi nga penalltia në këtë përballje sezonin e kaluar (humbje 6-2), ndërsa është kontribuesi kryesor këtë sezon për Montpellier-in (2 gola, 5 asistime), ndonëse nuk ka kontribuar me gola që nga shkurti.

Bradley Barcola, që shënoi në humbjen e PSG-së ndaj Strasbourg-ut, ka kontribuar drejtpërdrejt në gjashtë gola ndaj Montpellier-it në Ligue 1 (2 gola, 4 asistime), më shumë se ndaj çdo skuadre tjetër.

Statistikë interesante: Montpellier ka pësuar golin e parë në 29 ndeshje të Ligue 1 këtë sezon dhe mund të barazojë rekordin për një sezon të vetëm (që nga sezoni 1947/48), vendosur nga Ajaccio në sezonin 2022/23. /GazetaExpress/

Formacionet zyrtare:

⚽️ 𝑳𝑨 𝑪𝑶𝑴𝑷𝑶
👉 #MHSCPSG pic.twitter.com/GqFQMgJYeA

— MHSC (@MontpellierHSC) May 10, 2025

Montepelier

Notre XI de départ face à Montpellier ! 🔴🔵
#MHSCPSG I #Ligue1 pic.twitter.com/F6t8wl3rfE

— Paris Saint-Germain (@PSG_inside) May 10, 2025

PSG